Sońǵy táýlikte Batys Qazaqstan oblysynda koronavırýs ınfeksııasyn juqtyrǵan 51 adam tirkeldi. Tasqala aýdanynda karantın rejimi jarııalandy.
Koronavırýs ınfeksııasy anyqtalǵan 2 adam – Reseı Federasııasynda jumys isteıtin Shymkent qalasynyń turǵyndary eken. Olar Reseı Federasııasymen shekaradaǵy «Tasqala» avtoótkelindegi sanıtarlyq-karantındik beketten jedel járdem kóligimen karantındik stasıonarǵa jetkizilgen bolatyn.
Taǵy 10 adam buǵan deıin koronavırýs ınfeksııasyn juqtyrǵan adamdarmen qarym-qatynasta bolǵan eken. 12 adam profılaktıkalyq maqsatta synama alǵan kezde anyqtalǵan. Buǵan qosa Atyraý oblysynyń Teńiz ken ornynda jumys isteıtin Batys Qazaqstan oblysynyń turǵyndary arasynan 27 adam vırýs juqtyrǵan bolyp shyqty.
«Bul naýqastardyń bári de oblystyq juqpaly aýrýlar aýrýhanasyna ornalastyryldy. Naýqastarmen qarym-qatynasta bolǵan adamdar anyqtalyp, barlyǵy medısınalyq baqylaýǵa alyndy. Aýrý oshaqtarynda dezınfeksııalyq jumystar júrgizildi. Epıdemııaǵa qarsy sharalar jalǵasýda» dep habarlady Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti.
Indet taralǵaly beri oblysta koronavırýsty 544 adam juqtyrǵan eken. Olardyń 269-y jazylyp, úıine jiberilgen. Búginde juqpaly aýrýlar aýrýhanasynda 275 adam emdelýde. Sondaı-aq provızorlyq stasıonarda – 20, karantındik stasıonarda – 511, úı oqshaýlaýynda - 1276 adam dáriger baqylaýynda tur.
Sońǵy kúnderi aýrý sany óse túsken Tasqala aýdanynda 28 mamyrdan bastap Batys Qazaqstan oblysy Bas memlekettik sanıtarlyq dárigeriniń qaýlysymen karantın rejimi jarııalandy. Iаǵnı aýdanda 19 turǵyn vırýs juqtyrǵan. Sonymen birge Reseı Federasııasy shekarasynda turǵandyqtan, osy aýdan aýmaǵynan shetelde jáne elimizdiń basqa aımaǵynda turatyn 28 adamnan da COVID-19 dıagnozy anyqtalǵan.
Batys Qazaqstan