Batys Qazaqstan oblysynda koronavırýs ınfeksııasynan 53 jastaǵy azamat qaıtys boldy. Ol «Teńizshevroıl» JShS-i ken ornynda vahtalyq ádispen jumys istegen.
Ol 3 mamyr kúni Atyraý oblysynan Oral qalasyna áriptesterimen birge avtobýspen kelgen. Naýqastarmen qarym-qatynasta bolǵan adam retinde provızorlyq stasıonarda oqshaýlanyp, bir aptadan soń aýrý belgisi baıqalmaǵan soń úıine jiberilgen.
«10 mamyrdan bastap bekitilgen emhananyń medısına qyzmetkerleriniń baqylaýymen úı karantıninde boldy. 10 mamyrdan bastap tamaqtyń qyshýy, álsizdik, tábettiń tómendeýi belgileri paıda bolǵanyna qaramastan medısınalyq kómekke júginbegen. Kún saıyn qońyraý shalǵan medısına qyzmetkerlerine óz densaýlyǵyna shaǵymdanbaǵan. Kelesi 9 kún boıy medısınalyq kómekke júginbeı, 19 mamyr kúni júrip-turý kezinde entigý, tósekten tura almaı aıqyn álsizdik paıda bolǵan soń jedel járdem shaqyrtyp, provızorlyq stasıonarǵa jetkizildi» delingen dárigerlerdiń aqparat málimdemesinde.
Osy jerde naýqastan alynǵan analız onyń COVID-19 vırýsyn juqtyrǵanyn kórsetken. Oblystyq juqpaly aýrýlar aýrýhanasyna jetkizilip, tynys alýy qıyndaǵan soń jedel túrde oblystyq juqpaly aýrýhanynyń reanımasııalyq bólimshesine jatqyzylǵan.
Dárigerlerdiń aıtýynsha, naýqas jan saqtaý bóliminde aýyr jaǵdaıda bolǵan. Reanımasııalyq is-sharalar óz nátıjesin bermegen. Sóıtip, 30 mamyr kúni naýqastyń júregi jáne tynys alý qyzmeti toqtaǵan.
«Atalǵan fakt COVID-19 vırýsy óte qaýipti aýrý ekenin jáne oǵan nemquraıly qaraýǵa bolmaıtynynyń aıqyn dáleli. Kómekke ýaqytynda júgingende naýqasty ólimnen aman alyp qalýǵa bolatyn edi» delingen habarlamada.
31 mamyr kúni Batys Qazaqstan oblysynda 41 adamnan COVID-19 dıagnozy anyqtalyp, óńirde koronavırýs indetin juqtyrǵandar sany 621-ge jetti. Olardyń 285-i jazylyp, úıine shyqty. 336 adam juqpaly aýrýlar aýrýhanasynda em-dom alyp jatyr. Provızorlyq stasıonarda – 14, úı karantıninde – 1278 adam oqshaýlanǵan.
Batys Qazaqstan