Almaty oblysy polısııasynyń qolda bar kúshteri men quraldaryn utymdy paıdalaný arqasynda bıylǵy jyldyń bes aıynyń qorytyndysy boıynsha qylmys deńgeıin 36,7 paıyzǵa tómendetýge qol jetkizildi, dep habarlady IIM baspasóz qyzmeti.
Almaty oblysy polıseıleriniń materıaldyq jaraqtanýy qylmystar men quqyq buzýshylyqtardy der kezinde anyqtaýǵa jáne olardyń aldyn alýǵa múmkindik beredi.
– Ishki ister organdarynyń materıaldyq-tehnıkalyq bazasyn jetildirýge memleket tarapynan óte úlken kóńil bólinýde. Ol qylmyspen kúresýge, quqyq buzýshylyqtardyń aldyn alýǵa septigin tıgizip, zańdylyqty ornatýǵa jáne azamattardyń quqyǵyn qorǵap, qoǵamdyq tártipti ornatýǵa áser etedi. Qoǵamdaǵy quqyq buzýshylyqtyń aldyn alýda, sondaı-aq jol qozǵalysy qaýipsizdigin qamtamasyz etýde patrýldik polısııanyń avtoekıpajdary, ýchaskelik polısııa ınspektorlary men syrtqy qyzmet ókilderi úlken rólge ıe, – dedi Almaty oblysy PD Tylmen qamtamasyz etý basqarmasynyń basshysy Erlan Sársenbaev.
Avtokólikter oqıǵa ornyna tártip saqshylarynyń shuǵyl jetýi úshin paıdalanylady. Ol kóptegen qylmystardy “izin sýytpaı” ashýǵa múmkindik beredi, jol erejesin óreskel buzý derekterin áshkerelep, jol-kólik apattaryna jedel áreket etedi, ıaǵnı jol qaýipsizdigin qamtamasyz etedi.
– Jergilikti atqarýshy organdar ishki ister organdarynyń materıaldyq-tehnıkalyq bazasyn jetildirýge erekshe kóńil bóletinin atap ótkim keledi. Bul qylmyspen kúresý jáne quqyq buzýshylyqtardyń aldyn alý boıynsha alǵa qoıylǵan mindetterge qol jetkizýge jáne qaladaǵy tártipti qamtamasyz etýge, azamattardyń quqyǵy men zańdy múddelerin qorǵaýǵa múmkindik beredi, – dep tolyqtyrdy Erlan Sársenbaev.