Almatyda 25 mamyrdan bastap jazǵy alańdardy qosa alǵanda, qoǵamdyq tamaqtandyrýdyń 3100-den astam nysandary óz qyzmetin qaıta bastady.
Olardyń jumystarynyń negizgi sharty kórshi stoldaǵy otyrǵan kelýshilermen keminde 2 metr ara qashyqtyqty saqtaý jáne bir stolǵa, bir otbasy múshelerin aıtpaǵanda, 4 adamnan artyq adam otyrǵyzbaý qadaǵalanady. Qoǵamdyq tamaqtandyrý nysandarynyń jumysyna saǵat 23:00-ge deıin ruqsat berildi.
Áleýmettik qashyqtyqtandyrý qajet bolǵandyqtan, atalǵan mekemelerde otyrǵyzý oryndarynyń sany eń kem degende 1,5-2 esege tómendep ketti. Budan basqa, keıbir nysandarda jazǵy alańdar joq.
Halyq arasyndaǵy joǵary maýsymdyq suranysty eskere otyryp jáne qyzmet kórsetý salasynyń nysandaryn qoldaý maqsatynda, Almaty qalasynyń ákimdigi jazǵy alańdar sanyn, olardy irgeles jatqan aýmaqtarǵa ornalastyrý esebinen, arttyrý múmkindigin usyný týraly sheshim qabyldady.
Osylaısha, budan buryn jazǵy alańdary joq nysandarǵa meıramhananyń nemese kafeniń irgeles jatqan aýmaǵyna, kúrdeli qurylys salmaı, ýaqytsha, epıdemıologııalyq jaǵdaı turaqtanǵanǵa jáne shekteý sharalary alynǵanǵa deıin qosymsha oryndar qoıýǵa ruqsat etiledi. Bul rette, stoldar jaıaý júrginshilerge, velosıpedshilerge, sondaı-aq avtomobıl kóliginiń júrýine kedergi nemese qolaısyzdyq keltirmeýi tıis.
Almaty qalasynyń menshigindegi jer telimderiniń shekaralarynda maýsymdyq kafelerdi (jazǵy alańdardy) ornalastyrý jer-quqyqtyq qatynastary rásimdelmeı júzege asyrylady. Alaıda, atalǵan nysandardy turǵyn úılerdiń terezesiniń aldynan ashýǵa, sol úılerdiń turǵyndarynyń jazbasha kelisimi bolǵan jaǵdaıda ǵana ruqsat etiledi. Nysandardyń qyzmetine barlyq sanıtarııalyq-epıdemıologııalyq talaptar saqtalǵan jaǵdaıda, ruqsat etiledi.
Sonymen birge, qazirgi ýaqytta, qalada banketter men saltanatty jıyndar ótkizýge salynǵan tyıymdar sol kúıinde qalyp otyr. Sondaı-aq, atalǵan kezeńde karaoke, bılıard jáne basqa da qoǵamdyq tamaqtandyrý aýmaǵynda jumys isteıtin kóńil kóteretin mekemelerdiń jumysyna tyıym salynǵan. Kalıan jumystaryna karantınniń barlyq kezeńine tyıym salynǵan.
Qyzmetin qaıta bastaıtyn nysandardyń www.infokazakhstan.kz saıtyna tirkelýi qajettigin kosymsha habarlandy. Qazirgi ýaqytta, portalda 31 myń kásiporyn jáne 491 myńnan astam qyzmetker tirkelgen.