Nur-Sultan qalasynda Qurlyq áskerlerniń áskerı qyzmetshileri Máskeýde ótetin Uly Otan soǵysyndaǵy Jeńistiń 75 jyldyǵyna arnalǵan áskerı sherýge qatysýǵa daıyndalýda. Sharaǵa qazaqstandyq áskerı qyzmetshiler reseılik taraptyń shaqyrýymen qatysady. Bul týraly Qorǵanys mınıstrliginiń baspasóz qyzmeti habarlady.
Qazirgi ýaqytta úsh jaıaý sherý esebi quryldy. Atap aıtqanda, olardyń ekeýi desanttyq–shabýyldaýshy áskerler bólimsheleriniń quramynan, bireýi Qurlyq áskerleri Áskerı ınstıtýtynyń 3-kýrs kýrsanttary. 24 maýsymda paradqa qandaı esepter qatysatyny, 8 maýsymda ótetin sońǵy daıyndyqta anyqtalady.
«Bıyl Uly Otan soǵysyndaǵy Jeńis kúnine 75 jyl tolady. Osy sebepti Reseı Qorǵanys mınıstrligi bizdiń áskerlerdi Qyzyl alańdaǵy paradqa qatysý úshin shaqyrdy. Qurlyq áskerlerinen úsh esep top bólindi. Esepter óte jaqsy daıyndalǵan. Olar barlyq sanıtarlyq-gıgıenalyq talaptardy saqtaıdy. Kúnine úsh-tórt ret temperatýralary ólshenip, basqa da máseleler sheshiledi. Bizge Qyzyl alańdaǵy paradqa qatysyp, elimizdi kórsetý óte mańyzdy. Daıyndyq óte jaqsy júrip jatyr», - deıdi Qurlyq áskerleri bas qolbasshysynyń jaýyngerlik daıarlyq jónindegi orynbasary general-maıor Dáýlet Ospanov.
Áskerı qyzmetshiler úshin Uly Jeńistiń qurmetine arnalǵan sherýge qatysý, bul jalpy jeńis úshin qasyq qany qalǵansha shaıqasqan batyrlarǵa alǵys bildirý jáne qurmet kórsetý múmkindigi. Daıyndyqqa qatysýshylardyń arasynda, atalary Uly Otan soǵysynyń maıdan dalasynda jeńis úshin shaıqasqandar da, Máskeýdegi Jeńistiń alǵashqy sherýine qatysqandar da az emes.
«Men Uly Otan soǵysynyń ardageri Balǵymbaev Aıdarbaı Naýryzbaıulynyń nemeresimin. Desanttyq-shabýyldaýshy áskerleri arasyndaǵy saltanatqa qatysý úshin qatań irikteýden ótip, Máskeýde ótetin Uly Jeńistiń 75-jyldyǵyna arnalǵan sherýge qatysatynyma qýanyshtymyn», – deıdi 35-shi gvardııalyq desant-shabýylshy brıgadasynyń áskerı qyzmetshisi Serikbek Balǵymbaev.
Daıyndyq karantındik sharalardy qatań saqtaı otyryp júzege asyrylady. Dezınfeksııalyq-sanıtarlyq rejım kúsheıtildi: kúnine keminde eki ret jeke quramdy medısınalyq tekserý, sondaı-aq óńdeý, ylǵaldandyrý jáne jeldetý júrgiziledi. Paradqa qatysatyn áskerı qyzmetshiler qalǵan jeke quramnan oqshaýlanǵan, olarǵa bógde adamdar men týysqandarynyń barýy shektelgen.