Sıfrlyq damý, ınnovasııalar jáne aeroǵaryshtyq damý mınıstri Asqar Jumaǵalıev búgin áleýmettik jelidegi paraqshasynda jumys berýshiniń dıplomnyń shynaıylyǵyn onlaın tekserýi úshin dıplomdardy sıfrlandyrýdy usynǵanyn, jyl sońyna deıin dıplomnyń shynaıylyǵyn tekseretin servısti iske qosý josparlanǵanyn jazdy, - dep habarlaıdy Egemen.kz
Mınıstrdiń aıtýynsha, turǵyndar aýrýhana qaǵazyn elektrondy formatqa aýystyryp, dekrettik tólemderdiń proaktıvti kórsetilýin usynǵan.
"Bul másele de vedomstvoaralyq komıssııa otyrystarynda kóterilgen. Júkti áıelder HQO-ǵa kelip áýre bolmaýy úshin bosanýǵa deıingi jáne dekrettik tólemderdi proaktıvti formatqa aýystyrý usynylǵan. Keshe Eńbek jáne halyqty áleýmettik qorǵaý, Densaýlyq saqtaý mınıstrlikterindegi áriptestermen kezdesip, proaktıvti formatqa aýystyrýdy jedeldetý týraly ýaǵdalastyq. Jaqyn arada onyń nátıjesin habarlaımyn", dedi A. Jumaǵalıev.
Sonymen birge, turǵyndar qujattarǵa apostıl qoıý máselesin de kótergen. "Shetelde júrgen adamdarǵa keıde apostıli bar qujat qaǵaz júzinde kerek bop, ony Qazaqstannan aldyrý qajet bolady. Ádilet mınıstrligi e-apostıl ázirleýmen aınalysyp jatqanyn bilemin, bul qujattardy onlaın alýǵa múmkindik beredi. Shamamen tamyz aıynda bul qyzmet qoljetimdi bolýy múmkin. Halyqqa qyzmet kórsetý ortalyǵynda bank qosymshalary arqyly tólem jasaýǵa bolady. Qazir de memlekettik baj salyǵy QR-kod arqyly tólenedi. Úshinshi toqsannyń sońyna deıin basqa da qyzmet túrlerin, jyljymaıtyn múlikti tirkeý aqysyn da QR-kodpen tóleý múmkndigin jasaýdy tapsyrdym", dedi Asqar Jumaǵalıev.