Parlament Senaty Tóraǵasynyń orynbasary A.Shákirovtiń tóraǵalyq etýimen Senat janyndaǵy Jergilikti ókildi organdarmen (máslıhattarmen) ózara is-qımyl jasaý jónindegi keńestiń otyrysy ótti, dep habarlady Senattyń baspasóz qyzmeti.
Onlaın konferensııa baılanysy arqyly ótken otyrysqa Keńes múshelerimen qatar máslıhat depýtattary, sondaı-aq memlekettik organdar men qoǵamdyq uıymdardyń ókilderi qatysty. Otyrys barysynda koronavırýs pandemııasy kezinde óńirlerdegi áleýmettik-ekonomıkalyq turaqtylyqty saqtaý máseleleri jan-jaqty talqylandy. Jalpy alǵanda, ókildi organdardyń jumys oryndary men jumysshylardyń eńbekaqylaryn saqtaý, tegin azyq-túlikpen qamtamasyz etý men sanıtarlyq-gıgıenalyq kómek kórsetý, azyq-túlik taýarlarynyń baǵasyna baqylaý jasaý jumysyna oń baǵa berildi.
Máslıhattardyń tótenshe jaǵdaılarǵa baılanysty, ásirese Túrkistan oblysynda oryn alǵan tabıǵı apat zardaptaryn eńserý jáne turǵyndarǵa qoldaý kórsetý jumystaryna belsendi qatysqany atap ótildi. Depýtattyq korpýstyń óńirlerdegi jumysynyń mazmuny men olardyń kásibı biliktiligin arttyrý máselesine aıryqsha mán berildi. Máslıhat depýtattary óz saılaýshylaryna qabyldanǵan zańdardy, el basshylyǵy belgilegen baǵyt-baǵdarlardyń mánin uǵynyqty, kásibı turǵyda túsindirýi kerek. Bul turǵyda qaramaǵynda 20 myńnan astam kásibı kadry bar Qazaqstannyń zańgerler odaǵy qabyldanǵan memorandým negizinde barlyq óńirde jumystarǵa tartyldy.
Senator T.Muqashevtiń bastamasy boıynsha О́ńirlerdi damytý baǵdarlamasyna aýyldyq aımaqtardy jan-jaqty damytý sharalaryna basymdyq berý jónindegi túzetý qajettigi aıtylǵan Senat depýtattarynyń Premer-Mınıstrdiń atyna úndeýi týraly máslıhat depýtattary habardar etildi.
Keńes sondaı-aq «Rýhanı jańǵyrý» baǵdarlamasyn óńirlerde iske asyrý barysymen de tanysty.