Qazaqstandyqtardyń mamyr aıynda alǵan zeınetaqysy maýsymdaǵydan kóp boldy. Munyń sebebi – tólemderdi qosymsha 5%-ǵa ındekstegennen keıin sáýirde tolyq alynbaǵan qosymsha tólemder, - dep habarlaıdy Egemen.kz
Eńbek jáne halyqty áleýmettik qorǵaý mınıstrliginiń málimetinshe, Memleket basshysynyń 2020 jylǵy 30 naýryzdaǵy tapsyrmasy boıynsha zeınetaqy tólemderi men járdemaqylardy jyldyq mánde 10%-ǵa qosymsha ındeksteý júrgizildi. Osylaısha, 2020 jylǵy 1 qańtardan bastap júzege asyrylǵan bazalyq zeınetaqy men memlekettik járdemaqylar 5%-ǵa, al jasyna baılanysty zeınetaqy 7%-ǵa artqan kezde, 1 sáýirden bastap barlyq tólemder qosymsha taǵy 5%-ǵa ósti.
Sáýirdegi ósim avtomattandyrylǵan rejımde júzege asyryldy (qosymsha qujattardy talap etpesten), al mamyrda azamattar ósimdi eskere otyryp tólemder aldy. Sonymen qatar, azamattardyń sáýir aıynda almaǵan zeınetaqynyń jańa jáne eski mólsheri arasyndaǵy aıyrmashylyq mamyr aıynda kezekti zeınetaqy tólemimen birge tólendi.
Mysaly, eger 2020 jylǵy qańtardan bastap zeınetaqy tólemderiniń mólsheri (jasyna baılanysty zeınetaqy + bazalyq zeınetaqy) 90 400 teńgeni qurasa, aǵymdaǵy jylǵy 1 sáýirden bastap zeınetaqy tólemderiniń jańa mólsheri 94 920 teńgeni (90 400 teńge + 5% arttyrý) quraıdy. Bul rette tólem mamyr aıynda 99 440 teńgeni (94 920 teńge + sáýir aıyna qosymsha aqy 4520 teńge) qurady. Maýsym aıynda zeınetaqy tıisinshe 94 920 teńgeni qurady.
Esterińizge sala keteıik, 2020 jylǵy 1 sáýirden bastap eń tómengi zeınetaqy tólemi 58 082 teńge, onyń ishinde bazalyq zeınetaqy tóleminiń eń tómengi mólsheri – 17 641 teńge bolyp belgilengen.