Ortalyq saılaý komıssııasy negizgi is-sharalar josparyn bekitti

Otyrysty ashqan Ortalyq saılaý komıssııasynyń tóraǵa­sy Berik Imashev 2014 jyly saılanǵan Senat depýtattarynyń ókilettik merzimi osy jyldyń qazan aıynda aıaqtalatynyn atap ótti. Osylaısha 2020 jyldyń 12 tamyzynda respýblıkanyń 17 óńirinde Konstıtýsııalyq zańda belgilengen tártip boıynsha eli­mizdiń joǵarǵy zań shyǵarýshy organy – Senattyń bir-birden depýtatyn saılaý qajet.

Senat depýtattaryn janama saılaý quqyǵy negizinde jasyryn daýys berý kezinde tańdaýshylar – máslıhat depýtattary saılaıdy, olardy óz kezeginde jalpyǵa birdeı saılaýda Qazaqstan Res­pýblıkasynyń azamattary saı­laıdy. Senat depýtattarynyń óki­­lettik merzimi alty jyldy quraıdy. Bul rette jartysy árbir úsh jyl saıyn qaıta saı­­­­lanyp otyrady. Parlament Senaty depýtattarynyń saılaýyn uıymdastyrý men ótkizýge OSK basshylyq etedi. Tıisti aýmaq­tyq saılaý komıssııalary Par­lament depýtattarynyń saılaýyn óńirlerde daıyndaýdy jáne ótkizýdi qamtamasyz etedi.

Otyrysta saılaý naýqanynyń negizgi kezeńderi týraly OSK tór­aǵasynyń orynbasary Kons­tantın Petrov baıandama jasady. Onyń aıtýynsha, Parlament Senatynyń depýtattyǵyna kan­dı­dattardy usyný saılaý taǵa­ıyndalǵan kúnnen keıingi kúnnen, ıaǵnı 13 maýsymnan bastalady jáne saılaý ótkiziletin kúnge bir aı qalǵanda jergilikti ýaqyt boıynsha 2020 jylǵy 12 shildede saǵat 18.00-de aıaqtalady.

Parlament Senatynyń depý­tat­tyǵyna kandıdattar usynýdy máslıhattar, sondaı-aq ózin ózi usyný tártibimen júzege asyrady. Otyz jasqa tolǵan, joǵary bilimi jáne keminde bes jyl jumys ótili bar, tıisti oblystyń, res­pýb­lıkalyq mańyzy bar qala­nyń ne astananyń aýmaǵynda keminde úsh jyl turaqty turatyn adam Senat depýtaty bola alady. Sot áreketke qabiletsiz dep tany­ǵan azamattardy saılaýǵa jáne olardyń saılanýǵa quqyǵy joq.

Sottylyǵy zańda belgilen­gen tártippen ótelmegen nemese alynbaǵan adam, sondaı-aq sybaılas jemqorlyq qylmys jáne sybaılas jemqorlyq quqyq buzýshylyq jasaǵany úshin kinásin sot zańda belgilengen tártip­pen tanyǵan adam Qazaq­stan Par­lamenti Senatynyń depýtat­tyǵy­na kandıdat bola almaıdy.

Tıisti ákimshilik-aýmaqtyq birlik boıynsha Senat depýtat­tyǵyna kandıdat bolyp daýysqa túsý nıeti týraly qujattar kelip túsken kezde oblystyq, respýb­lıkalyq mańyzy bar qalalardyń nemese astananyń saılaý komıs­sııasy: 1) úsh kún ishinde kandı­dattyń Konstıtýsııada jáne osy Konstıtýsııalyq zańda qoıylatyn talaptarǵa sáıkestigin belgileıdi; 2) tekserý aıaqtalǵan kúnnen bastap úsh kún merzimde oǵan tańdaýshylardyń qoldaryn jınaý úshin qol qoıý paraqtaryn beredi.

Senat depýtattyǵyna kandıdatty oblystyń barlyq máslıhat­taryn, respýblıkalyq mańyzy bar qala­nyń nemese respýblıka as­ta­na­sy­nyń máslıhattaryn bildi­re­tin tańdaýshylardyń jalpy sany­­­nyń keminde on paıyzynan, biraq bir máslıhattyń tańdaý­shy­lar daýy­s­y­nyń jıyrma bes paıy­zy­nan as­paı­tyn daýysymen qoldaýǵa tıis.

Senat depýtattyǵyna kandıdattardy tirkeý barlyq qajetti qujattardy alǵannan keıin bas­talady jáne saılaý kúninen jıyrma kún buryn jergilikti ýaqyt boıynsha saǵat 18.00-de, ıaǵnı 2020 jylǵy 23 shildede jergilikti ýaqyt boıynsha saǵat 18.00-de aıaqtalady.

Parlament Senatynyń depý­tat­tyǵyna kandıdattardy tir­keýdi oblystyq, qalalyq nemese aýdandyq máslıhattyń depý­tat­tyqqa kandıdatty usyný týraly sheshimi (máslıhat usynǵan jaǵdaıda); depýtattyqqa kandıdat bolyp daýysqa túsýge kelisimi týraly ótinishi; tıisti saılaý komıssııasynyń kandıdatty qoldap tańdaýshylardyń qoldaryn tekserý nátıjeleri týraly hattamasy; kandıdattyń ómirbaıandyq derekteri; onyń jubaıynyń (zaıybynyń) tabysy men múlki týraly deklarasııa tapsyrǵany týraly Memlekettik kiris organy­nyń anyqtamasy; kan­dı­dattyń saı­laý jarnasyn engiz­genin kýálan­dyratyn 637 500 teńge somasyn­da qujat bolǵan jaǵdaıda oblys­tyq, respýblıkalyq mańyzy bar qala­lar­dyń jáne astananyń saılaý komıssııalary júzege asyrady.

Saılaý aldyndaǵy úgit kandıdattardy tirkeý merzimi aıaqtal­ǵan kezden, ıaǵnı 2020 jylǵy 23 shildede saǵat 18.00-den keıin bastalady jáne daýys berý kúni­niń aldyndaǵy kúngi jergilikti ýaqyt boıynsha nól saǵatta, ıaǵnı 11 tamyzda saǵat 00.00-de aıaqtalady. Senat depýtatynyń saılaýyndaǵy daýystardy sanaý nátıjeleri daýys berý pýnktinde ótkiziletin tıisti saılaý komıssııasynyń otyrysynda belgilenedi. Senat depýtatyn saılaý jónindegi daýystardy sanaý hattamasy tańdaýshylardyń birlesken otyrysynda jarııa etiledi jáne ony saılaý kúninen bastap eki kúnnen aspaıtyn merzimde OSK-ǵa jiberedi.

Senat depýtattaryn jalpy respýblıka boıynsha saılaýdyń qory­tyndylaryn saılaý ótkizil­gen kúnnen bastap jeti kún merzim­nen keshiktirmeı OSK belgileıdi.

Ortalyq saılaý komıssııasy 2014 jyly saılanǵan Senat depýtattarynyń ókilettik merzimi aıaqtalǵanǵa deıingi merzimde, ıaǵnı 2020 jylǵy 14 qazanǵa deıin Senattyń jańadan saılanǵan depýtattaryn tirkeıdi.

Otyrys barysynda Ortalyq saılaý komıssııasynyń tóraǵasy Berik Imashev «saılaý prosesiniń zańdylyǵy men jarııalylyǵyn qamtamasyz etýmen qatar, barlyq qatysýshylardyń densaýlyǵy úshin barynsha qaýipsiz jaǵdaıda saılaý ótkizý – saılaý komıssııalary úshin basty basymdyq», dedi.

Otyrystan keıin brıfıng ótip, OSK músheleri BAQ suraq­taryna jaýap berdi. Sondaı-aq brıfıng barysynda OSK-nyń baspasóz ortalyǵy karantın jáne qaýipsizdik sharalaryn saqtaý qajettiligi jaǵdaıynda onlaın-rejiminde jumys isteıtin bolady, barlyq kommýnıkasııalar tehnıkalyq baılanys quraldary arqyly júzege asyrylady.