Iran tarapynyń bastamasymen Qazaqstan Respýblıkasy Indýstrııa jáne ınfraqurylymdyq damý mınıstri Beıbit Atamqulov Iran Islam Respýblıkasynyń Jol jáne qalalyq damý mınıstri Mohammad Eslamımen telefonmen sóılesti, dep habarlady IIDM baspasóz qyzmeti.
Taraptar Qazaqstan men Iran arasyndaǵy kólik tasymaly, júk tranzıti, avıasııalyq qatynas jáne t.b. salalardaǵy ekijaqty yntymaqtastyqty tereńdetý perspektıvalaryn talqylady.
Iran tarapy Qazaqstan-Túrkimenstan-Iran temir joly áleýetin, sondaı-aq Kaspıı teńizi arqyly mýltımodaldyq dálizderdi tıimdi paıdalana otyryp, júk tasymaly kólemin ulǵaıtýǵa múddeli ekenin málimdedi.
Sondaı-aq eldegi men álemdegi epıdemıologııalyq jaǵdaıdy eskere otyryp, eki el arasyndaǵy áýe qatynasyn qalpyna keltirý maqsatynda qajetti rásimderdi ótkizýdiń mańyzdylyǵyn atap ótti. Sonymen birge áńgime barysynda kólik salasyndaǵy birlesken jobalardy iske asyrý perspektıvalary talqylandy.
Kelissózder qorytyndysynda taraptar bolǵan áńgime úshin rızashylyqtaryn bildirip, Qazaqstan men Iran arasyndaǵy qarym-qatynasty odan ári damytýdyń mańyzdylyǵyn atap ótti.