Qazaqstannyń Tuńǵysh Prezıdenti Nursultan Nazarbaevtyń atyna Reseı Federasııasynyń Prezıdenti Vladımır Pýtınnen, Qytaı Halyq Respýblıkasynyń Tóraǵasy Sı Szınpınnen, Túrkııa Respýblıkasynyń Prezıdenti Rejep Taııp Erdoǵannan, О́zbekstan Respýblıkasynyń Prezıdenti Shavkat Mırzııoevten, Túrikmenstannyń Prezıdenti Gýrbangýly Berdimuhamedovten, Tájikstan Respýblıkasynyń Prezıdenti Emomalı Rahmonnan, Serbııa Respýblıkasynyń Prezıdenti Aleksandr Výchıchten jáne Horvatııa Respýblıkasynyń burynǵy Prezıdenti Stepan Mesıchten jedelhattar kelip tústi. Sondaı-aq atalǵan tulǵalar Elbasynyń syrqattanyp qalýyna baılanysty óz jedelhattary arqyly alańdaýshylyqtaryn bildire otyryp, tezirek saýyǵyp ketýine tilektes ekendigin jetkizdi, dep habarlady Elbasynyń baspasóz qyzmeti.
«Men Sizge osy qıyn sátte qoldaý bildirgim keledi. Sizdiń erekshe ómirlik energııańyz, sergektigińiz ben optımızmińiz qysqa merzimde vırýsty jeńýge kómektesedi dep senemin. Shyn júrekten Sizdiń tolyq aıyǵyp ketýińizdi tileımin. Denińiz saý bolsyn», delingen Reseı Federasııasy Prezıdentiniń jedelhatynda.
* * *
QHR Tóraǵasynyń jedelhatynda: «Koronavırýs ınfeksııasy órshı bastaǵan sátten Qytaı men Qazaqstan epıdemııaǵa qarsy jemisti yntymaqtastyq júrgizip keledi. Bul Qytaı-Qazaqstan qatynastarynyń máńgilik jan-jaqty strategııalyq seriktestiginiń joǵary deńgeıi men erekshe sıpatyn kórsetip otyr. Sondaı-aq halyqaralyq qaýymdastyq úshin pandemııaǵa qarsy birlesip áreket etýdiń jarqyn úlgisine aınaldy. Epıdemııany jeńetinimizge kámil senimdimin. Al ekijaqty qatynas budan da nátıjeli damı túsedi degen oıdamyn. Men Sizben qalyptasqan jaqyn dostyq qarym-qatynasty erekshe baǵalaımyn jáne shyn júrekten tezirek saýyǵyp ketýińizdi tileımin», dep jazylǵan.
* * *
Túrkııa Prezıdenti tileýlestigin óz jedelhaty arqyly bylaı jetkizdi: «Syrqattanyp qalǵanyńyzdy ókinishpen estidim. Alladan shıpa berýin tileımin. Únemi jeńispen eńsergen kúresterdegi syndy bul synaqty da jigerińizben artqa tastaıtynyńyzǵa kámil senemin. Qandaı da bir qajettilik týyndaǵan jaǵdaıda qolymyzdaǵy barlyq múmkindigimizben janyńyzda ekenimizdi jetkizgim keledi. Sizge degen tereń qurmet pen súıispenshilik sezimimen jeke ózim jáne barsha túrik halqy atynan tezirek saýyǵyp ketýińizdi shyn júrekten tileımin».
* * *
О́zbekstan Prezıdenti óz lebizin jedelhat arqyly: «Sizge osynaý qıyn-qystaý ýaqytta jan-jaqty qoldaý kórsetýge jáne janyńyzda bolýǵa daıyn ekenimdi jetkizgim keledi. Jaqyn arada Sizdiń bul vırýsty jeńip, saýyǵyp ketetinińizge senimdimin.
Qurmetti Nursultan Ábishuly, Alla taǵala Sizge zor densaýlyq, kúsh-qýat, uzaq ǵumyr jáne jańa tabys bersin dep tileımin. Jaqynda О́zińizben júzdesý múmkindigi týady degen úmittemin», dep bildirgen.
* * *
«О́mirlik energııańyz ben erik-jigerińizdiń arqasynda Siz bul dertti qysqa merzimde eńseresiz dep senemin. Sizdi barynsha qoldaýǵa jáne qajet bolǵan jaǵdaıda kómektesýge daıynmyn. Shyn júrekten tezirek saýyǵyp ketýińizdi tileımin. Alla taǵala Sizge myqty densaýlyq jáne uzaq ǵumyr bersin», delingen Túrikmenstan Prezıdentiniń jedelhatynda.
* * *
Tájikstan Prezıdentiniń jedelhatynda: «Sizge baýyrlastyq qoldaýymdy bildirgim keledi. Shyn júrekten tezirek tolyq saýyǵyp ketýińizdi jáne uzaq ǵumyr, baq-bereke tileımin. Sizge degen zor qurmetim men ystyq yqylasymdy qabyl alyńyz», delingen.
* * *
Serbııa Prezıdenti óz jedelhaty arqyly: «О́zińizge tán energııa, kúsh-qaırat, optımızm koronavırýstan basym túserine sene otyryp, Sizge qoldaýymdy bildirgim keledi. Jaqyn arada halyqaralyq qoǵamdastyq ózara túsinistik pen yntymaqtastyqtyń arqasynda pandemııany eńseredi jáne kedergisiz áleýmettik-ekonomıkalyq damý jolyna qaıta oralady degen úmittemin. Aıyǵyp ketýińizdi shyn júrekten tileımin. Meniń zor qurmetim men ystyq yqylasymdy qabyl alyńyz», degen izgi tilegin joldaǵan.
* * *
Sondaı-aq keıbir memleket basshylary Elbasyna arnalǵan sálemin Twitter áleýmettik jelisi arqyly jetkizdi. Atap aıtqanda, Izraıl Prezıdenti Reýven Rıvlın Nursultan Nazarbaevqa tezirek saýyǵyp ketýine tilektestik bildire otyryp, bizdiń elderimizdiń jaqsy qarym-qatynasty jalǵastyryp kele jatqanyn jetkizdi.
* * *
Úndistannyń Premer-Mınıstri Narendra Modı de óziniń izgi tilegin áleýmettik jeli arqyly bildirdi.
«Qazaqstannyń Tuńǵysh Prezıdenti – Elbasy Nursultan Nazarbaevtyń tezirek saýyǵyp ketýin jáne myqty densaýlyq tileımin. Biz Qazaqstandy, bizdiń dosymyzdy jáne strategııalyq seriktesimizdi COVID-19 pandemııasyn jeńýge degen umtylysyn qoldaımyz», dep jazdy Úndistannyń Premer-Mınıstri Narendra Modı óziniń Twitter-degi jazbasynda.
* * *
Horvatııanyń burynǵy Prezıdenti Stepan Mesıch Qazaqstannyń Tuńǵysh Prezıdentine joldaǵan jedelhatynda: «Sizdiń syrqattanyp qalǵanyńyz týraly habardy alańdaýshylyqpen qabyldadym. Shyn júrekten tezirek tolyq saýyǵyp ketýińizdi, kúsh-qaırat pen sarqylmas optımızm tileımin», dep jazdy.
* * *
Sondaı-aq Elbasynyń densaýlyǵyna AQSh-tyń Memlekettik hatshysy Maık Pompeo da alańdaýshylyǵyn bildirdi. «Qazaqstan Respýblıkasynyń Tuńǵysh Prezıdenti Nursultan Nazarbaevtyń COVID-19 indetinen tezirek tolyq saýyǵyp shyǵýyn tileımin. Elderimiz úshin qazir syn saǵaty týyndady. Bul indetti de birlese jeńetinimizge senimdimin. Tez saýyǵyp ketińiz jáne aman bolyńyz!» dep ol óz tilegin Twitter-degi jeke paraqshasynda.
* * *
Tuńǵysh Prezıdent – Elbasy Nursultan Nazarbaevqa izgi tilegin joldaǵan hattar legi qazaqstandyqtar men shetel azamattary tarapynan da tolassyz jalǵasýda.
Májilis depýtattary Nursultan Nazarbaevtyń tezirek saýyǵyp ketýin tileı otyryp, sarqylmas kúsh-qýaty men erik-jigeri Elbasyna koronavırýs indetin jeńýge múmkindik beretinine senim bildirdi. Májilistiń baspasóz qyzmeti habarlaǵandaı, depýtattar Tuńǵysh Prezıdenttiń kez kelgen jaǵdaıdan jol tabatyn erekshe qabileti elimizdiń qıyn-qystaý ýaqyttarǵa tótep berip, bolashaqqa senimmen qaraýǵa múmkindik beredi dep esepteıdi. Sondaı-aq Májilis depýtattary osy kúni barlyq qazaqstandyqtardyń Elbasyna shynaıy janashyrlyq tanytýy, halyqtyq qoldaýyn aıǵaqtaıtynyn atap ótti. «Biz Elbasymyz Nursultan Ábishuly Nazarbaevtyń tezirek saýyǵyn jáne uzaq ǵumyr tileımiz», dedi Májilis depýtattary.
Qazaqstan Respýblıkasy Konstıtýsııalyq Keńesiniń Tóraǵasy Q.Mámı elimizdiń Tuńǵysh Prezıdenti – Elbasy, Konstıtýsııalyq Keńestiń ǵumyr boıy múshesi N.Á.Nazarbaevqa óziniń jyly lebizin bylaı bildiripti: «Qurmetti Nursultan Ábishuly! Sizdiń koronavırýs ınfeksııasynyń saldarynan ózin-ózi oqshaýlaý rejimine kóshkenińiz týraly habardy men jáne Konstıtýsııalyq Keńes quramy da alańdaýshylyqpen qabyldady. Sizdiń búkil ómirińiz ben eńbek jolyńyz konstıtýsııalyq qundylyqtardy bekitý isindegi qıyndyqtar men jańa syn-qaterlerdi eńserýmen baılanysty. Kúsh-jigerge toly minezińizdiń, optımıstik ustanymyńyzdyń jáne myqty rýhyńyzdyń arqasynda Siz árqashan oqıǵalar barysyn baǵyndyryp, qoǵam men memleketti jańǵyrtýdaǵy berik baǵytyńyzdy qamtamasyz ete aldyńyz. Konstıtýsııalyq Keńestiń ǵumyr boıy múshesi retinde Siz Ata zańnyń ústemdigin qamtamasyz etý jónindegi qyzmetke jańa serpin berip otyrsyz. Konstıtýsııalyq Keńes ujymy jalpyhalyqtyq qoldaýǵa qosylady jáne Sizge tez saýyǵyp ketýińizdi, Otanǵa degen jasampaz qyzmetińizdi odan ári jalǵastyrýdy tileıdi».
«Asa qadirli Nursultan Ábishuly! Teledıdar men gazetten Sizdiń naýqastanyp qalǵanyńyzdy bilip, hatpen de bolsa kóńilińizdi demegimiz keldi. Tezirek saýyǵyp ketińiz! Aman-esen halqyńyzben qaýyshyńyz, – deıdi izgi nıetpen Qazaqstan Ulttyq ǵylym akademııasynyń akademıkteri S.Qırabaev pen Á.Beısenova, – «El tilegi – er tilegi» degen. Dál osy jaýapty da qıyn ýaqytta Sizdiń esendigińiz Otanymyz úshin asa mańyzdy. Týabitti kúresker, qaıtpas qaısar tulǵasyz, sondyqtan tótennen kelgen bul keseldi de jeńetinińizge senimdimiz. Jaratqan ıemiz Sizge erik-jiger, kúsh-qýat bersin. Sanaýly kúnderde mańdaıyńyz jarqyrap, otbasy-áýletińizdiń ortasynda, el aldyna shyǵýǵa jazsyn. Shýaqty, araıly kúnder kóp bolsyn!»
Al akademık T.Sharmanov óz tilegin: «Búgingi tańda halyqtyń mazasyn alǵan koronavırýs ınfeksııasynan tezirek jazylyp ketýińizge shynaıy tilegimdi joldaımyn. Táýelsiz Qazaqstan halqynyń araılaǵan tańy árdaıym ózińizben birge atyp keledi. Laıym, uzaq ýaqyt boıy osylaı bolýǵa jazsyn. Zor densaýlyq, sapaly uzaq ǵumyr tileımin», dep joldady.
«ArcelorMittal» kompanııasynyń tóraǵasy – bas dırektor L.N.Mıttal da Tuńǵysh Prezıdenttiń tezirek saýyǵyp ketýine tilektestigin bildirdi.
«Munaıgaz kesheni ardagerleri» RQB Keńesiniń tóraǵasy, Qazaqstannyń Eńbek Eri Uzaqbaı Qarabalın men osy qoǵamdyq birlestiktiń Bas dırektory Zeınolla Alshymbaev: «Bizder – munaıshylar, bizdi Nursultan Ábishulymen tyǵyz da bólinbes baılanys biriktirip tur dep esepteımiz. Bizdiń áriptesterimiz árqashan munaıgaz salasynyń qaryshtap damýyna sebep bolǵan onyń qamqor kózqarasyn umytqan emes. Biz, qazaqstandyq munaıshylar, Elbasyn elimizdiń «№1 munaıshysy» dep ataımyz. Bolǵan iske qaramastan, Elbasynyń temirdeı erik-jigerin, onyń ómirlik energııasyn, berik rýhyn jaqsy bilemiz. Mine, naq osy asyl qasıetteri ony bul synaqtan da alyp shyǵatynyna bek senemiz. Munaıgaz salasynyń ardagerleri, Nursultan Ábishulynyń tezirek saýyǵyp ketýine shyn júrekten tilektestik bildiredi. Sizge uzaq ta belsendi, shyǵarmashylyq ómir tileımiz. Qadirli Elbasy, biz árqashan Sizben birgemiz!», deıdi ózderiniń qoldaý-hatynda.
M.Iý.Lermontov atyndaǵy Memlekettik akademııalyq orys drama teatrynyń ujymy: «Elbasyn ómirdiń qaı soqqysyna da tótep bere alatyn kúresker retinde bilemiz. Jer júzinde mıllıondaǵan adam Elbasyna úlken qurmetpen, mahabbatpen qaraıdy. Biz de densaýlyq tilegenderge qosylyp, Elbasyna kúsh, jiger men jaqsy kóńil kúı tileımiz», dep jazady.
«Nazarbaev Zııatkerlik mektebi» derbes bilim berý uıymynyń basqarma tóraǵasy K.Shámshıdınova óz hatynda: «Biz, Nazarbaev zııatkerlik mektebiniń oqýshylary men muǵalimderi, Sizdiń oqshaýlanǵanyńyz týraly habardy estip, qatty alańdadyq. Sizdi ýaıymdaımyz. Sizdiń tabandylyǵyńyz, ómirge qushtarlyǵyńyz, jigerińiz ben qýatyńyz bul aýrýdy jeńedi dep senemiz», depti.
«О́zińiz negizin qalaǵan L.N.Gýmılev atyndaǵy Eýrazııa ulttyq ýnıversıtetiniń ujymy tezirek aıyǵýyńyzǵa, qıyndyqty eńserýińizge tilektes. Bul synaqtan da múdirmeı ótesiz dep kámil aıta alamyz. Jaratqan ıemiz jaqsy kúnderde, qýanyshty jaǵdaıda, naqty aıtsaq Eýrazııa ulttyq ýnıversıtetiniń 25 jyldyq mereıtoıynyń tórinde kezdesýge jazsyn!», deıdi osy oqý ornynyń rektory E.Sydyqov.
Abaı atyndaǵy Qazaq ulttyq pedagogıkalyq ýnıversıtetiniń rektory T.Balyqbaev ózi basqaryp otyrǵan bilim oshaǵy ujymynyń atynan: «Keń-baıtaq Otanymyzdyń ár aımaǵynan sizdiń densaýlyǵyńyzǵa alańdaǵan jurtshylyqtyń júrek dúrsili, ózińizge degen eldiń shyn tilektestigi aqparattar álemin dúbirletýde. Bul týǵan halqyńyzdyń Elbasyna degen súıispenshiliginiń jarqyn kórinisi dep bilemin. Jaratylysy bólek, rýhy kúshti, jigeri qurysh, qajyr qaıraty tolaǵaı Sizdiń bul synnan da jasyndaı jarqyldap óte shyǵatynyńyzǵa senemin jáne osyǵan tilektespin», degen tilegin jetkizipti.
Nazarbaev Ýnıversıtettiń basshysy Sh.Katsý: «Nazarbaev Ýnıversıtettiń stýdentteri, ata-analary jáne barlyq qaýymdastyǵy atynan Sizge shyn kóńilden denińizge saýlyq, qajymas kúsh-qýat, uzaq ǵumyr tileımiz. Biz Sizben birgemiz!» deıdi óz hatynda.
«Siz ınjenerlik bilim negizderin alǵan joǵary oqý orny – Qaraǵandy memlekettik tehnıkalyq ýnıversıtetiniń oqytýshylary, qyzmetkerleri, doktoranttary, magıstranttary men stýdentteri, san myńdaǵan ujymy shyn júrekten Sizdiń tezirek saýyǵyp ketýińizdi tileıdi. Muqalmas erik-jigerińiz, kúshti minezińiz, optımıstigińiz osy qıyn syn-qaterdi tez jeńedi dep senemiz. Shyn júrekten Sizge zor densaýlyq tileımiz», deıdi Qaraǵandy memlekettik tehnıkalyq ýnıversıtetiniń rektory M.Ibatov.
«Siz júrgizgen syndarly saıasat pen reformalar táýelsiz Qazaqstan turǵyndarynyń ál-aýqatyna tek jaqsy jaǵynan áser etti. Nursultan Ábishuly, biz qarapaıym jumysshy tap ókilderi Sizdiń tezirek saýyǵýyńyzdy tileımiz. Qazir myńdaǵan qaraǵandylyqtyń ózińizge qoldaý bildirip otyrǵanyn bilseńiz deımiz», depti izgi nıetpen «YDD Corporation» Qaraǵandy ferroqorytpa zaýytynyń, «Qazaq Carbon» quıý zaýyttary birlestiginiń ujymy jáne aksıonerler E.Nyǵmatýlın, D.Kemertelıdze, J.Appaz.
«Astana Balet» teatrynyń ujymy atynan mekeme dırektory A.Savostıanov óz qoldaýyn bylaı jetkizipti: «Mádenıet salasyna degen erekshe yqylasyńyzdyń arqasynda elimizdiń ónerin halyqaralyq arenada maqtanyshpen tanystyryp júrgen qaıtalanbas shyǵarmashylyq ujymdar qalyptasty. О́zińizge zor densaýlyq pen tezirek saýyǵyp ketýińizdi tileıdi».
Qazaqstannyń Trıatlon federasııasynyń sportshylary Elbasyna «Federasııa sportshylarynyń atynan denińizge saýlyq, myqty rýh pen jaqsylyq tileımiz. Barsha qazaqstandyqqa úlgi bolǵan kúsh-qýatyńyz osy jolǵy synaqtan da jeńimpaz bolyp shyǵýyńyzǵa kómektesetinine senimdimiz», degen lebizderin arnady.
Qazaqstan respýblıkalyq kásibı boks federasııasynyń prezıdenti E.Bekhojın: «Dúnıe júzin jaýlap alǵan vırýs Qazaqstannyń Tuńǵysh Prezıdenti Nursultan Ábishulyn da aınalyp ótpegenin estip, zor qaıǵyda qaldyq. Elbasynyń boıyna qýat, baqytty ǵumyr, uzaq ómir tileımiz!» deıdi.
«Samuryq-Qazyna» AQ kompanııalar tobynyń 300 myńnan astam qyzmetkeri: «Sizdiń tez arada saýyǵyp ketýińizdi tileımiz. Barsha álemdi jaılaǵan daǵdarys jaǵdaıynda Sizdiń erekshe qamqorlyǵyńyzdy jáne meıirimińizdi sezindik. Biz Sizge árdaıym tilektespiz. Bul dertti tez arada jeńetinińizge senimdimiz», depti óz hattarynda.
Nazarbaev Ýnıversıtettiń barlyq stýdentteri men túlekteri de Elbasyna ózderiniń qoldaýlaryn jetkizdi.
Elordadaǵy Ulttyq mýzeıdiń dırektory Arystanbek Muhamedıuly Tuńǵysh Prezıdentke tilektes ekenin tanytyp: «Mýzeı qyzmetkerleri Siz artqan senimdi aqtaý jolynda eńseli eńbek etip keledi. Qazaqstan Respýblıkasy Ulttyq mýzeıiniń ujymy Sizge zor densaýlyq jáne tezirek saýyǵyp ketýińizdi tileıdi!» dedi óz hatynda.
Sonymen qatar ERG kompanııalar tobynyń, Sokolov-Sarybaı óndiristik birlestiginiń, «Ahsel Holding», «Santehprom» JShS, «Temirtaý elektr metallýrgııalyq kombınaty» AQ, «Ortalyq Azııa otyn-energetıkalyq kompanııasy» AQ, «AK Altynalmas» AQ, «Sary Kazna» JShS, «Qazaqstan alıýmınııi» AQ jáne basqa da kóptegen qurylymnyń eńbek ujymdary, basshylary jáne jekelegen azamattar Elbasyna ózderiniń ystyq yqylastaryn bildirip, saýyǵyp ketýin tilegen hattaryn joldaýda.