Oblystyq forýmda órender osy saýalǵa jaýap izdedi
Oblys jastarynyń bıylǵy forýmy Qostanaı qalasynan áýdem jerdegi qaıyńy men qaraǵaıy, teregi jaıqalǵan «Belaıa ıýrta» demalys bazasynda ótti. Bul orynda túrli sharalar ótip júr, biraq sózi men isinen jalyndaǵan alaýdaı jastyq jiger atoılaǵan jastar kelgende tabıǵat aıasy da jumaqqa aınalyp júre bergendeı bolady. Forým jumysyna óńirdegi jastar belsendileri, «Jasyl el», pedagogıkalyq jáne qurylys jasaqtarynyń jas sarbazdary, aýyldyń jastary jáne jas jumysshylar, jas mamandar, etnomádenı birlestikterdiń jastary, úkimettik emes uıymdar jetekshileri qatysty.
Oblystyq forýmda órender osy saýalǵa jaýap izdedi
Oblys jastarynyń bıylǵy forýmy Qostanaı qalasynan áýdem jerdegi qaıyńy men qaraǵaıy, teregi jaıqalǵan «Belaıa ıýrta» demalys bazasynda ótti. Bul orynda túrli sharalar ótip júr, biraq sózi men isinen jalyndaǵan alaýdaı jastyq jiger atoılaǵan jastar kelgende tabıǵat aıasy da jumaqqa aınalyp júre bergendeı bolady. Forým jumysyna óńirdegi jastar belsendileri, «Jasyl el», pedagogıkalyq jáne qurylys jasaqtarynyń jas sarbazdary, aýyldyń jastary jáne jas jumysshylar, jas mamandar, etnomádenı birlestikterdiń jastary, úkimettik emes uıymdar jetekshileri qatysty.
– Jastardyń basqosýy, forým – qazir oınap-kúlip taraıtyn shara emes. Onda belgili bir istiń bitýine, jastardyń bir ushqyn alyp ketýine jaǵdaı jasaýǵa tyrystyq. Olarǵa kóp nárse úırenýi, kórýi kerek. Mysaly, bıylǵy forýmda «Jastar bizdiń memleketimizdiń órkendeýi úshin ne usyna alady?» degen máseleni tótesinen qoıdyq. Bul olardy oılandyrady, – deıdi oblystyq jastar saıasaty máseleleri jónindegi basqarma basshysy Álııa Saparova.
Forýmnyń basty ıdeıasy da osy boldy: jastar bizdiń memleketimizdiń órkendeýi úshin ne usyna alady? Jastar aldymen óziniń týǵan aýylynda, mektebinde, aýdanynda ózin kórsetýi, jaqsy isterge talpynýy, bilim alýy qajet. О́z mektebiniń, kóshesiniń, aýylynyń problemasyn kókirek kózimen kóre alýy tıis. Forým uıymdastyrǵan «áleýmettik lıft» osydan bastalady. Aıtarǵa bári de qarapaıym sekildi. Jaqsy oqyǵan bala mekteptegi qurbylaryna úlgi bolady, odan aýyldaǵy úlkenderdiń alǵysyn alǵan bozbala ýaqytpen birge ósip, kásibı bıikteıdi, eliniń, jurtynyń úmitin aqtar tulǵaǵa aınalady. Munyń barlyǵy da jastarǵa tereń bilim alǵanda, sharq uryp izdengende múmkin bolatynyn nasıhattaýdy forým ózine maqsat etip aldy.
Oblys jastarynyń bıylǵy forýmy jańa formatta ótti. Onda on-line júıesimen daýys berý arqyly saılanǵan jáne “Jastardyń altyn kitabynyń» laýreattarynan, respýblıkalyq jastar uıymdarynan, jastar bastamasy ortalyqtarynan shaqyrylǵan – barlyǵy 120 delegatty forýmda sarapshylar jobalar jasaý men utymdy bastamalar kóterýge oqytty. Bul úshin toptyq jumystarda mıkserler, trenıngter, pikiralmasýlar boldy. «Jas kelse – iske!» degen. Eń bastysy, – jastarda qyzyqty bastamalar bolsa, ol ómirge joldama alary da haq. Forýmda «Projectlive» shyǵarmashylyq zerthananyń jumysy tıimdiligin kórsetti. Onda forýmǵa qatysýshylar bes topqa bólinip, bilim berý, densaýlyq saqtaý, áleýmettik qorǵaý, aýyl sharýashylyǵy jáne kásipkerlik, jastar saıasaty men mádenıet salalaryna jasaǵan jobalaryn quramynda oblystaǵy sala basqarmalarynyń jetekshileri men mamandary bar ekspertter toby qarap, onyń úzdigin anyqtady. Altynsarın aýdanynan kelgen jastardyń «Krasnyı kordon aýylyndaǵy eski saıabaqty qalpyna keltirý» jobasy úzdik dep tanyldy. Ksenııa Ponomarenko jetekshilik etetin bul jobany jasaǵandar osy isti tııanaqtaý úshin demeýshilerge deıin taýyp qoıǵan eken. Olarǵa 100 myń teńgeniń sertıfıkaty tapsyryldy.
Joba jasaýdyń sharty boıynsha onyń júzege asyrylýyna elý adam tartý kerek. Sonymen qatar, ol qarjyny az kerek etetin, kúndelikti tirlikte qarapaıym, usaq-túıek bolyp kóringenimen mańyzy úlken bolýy jáne bir aıdyń ishinde júzege asyrylýy tıis. Jobalar jas otbasylarynyń bala tárbıesi, kóshelerdi taza ustaý, qarttarǵa kómek berý sııaqty kóptegen áleýmettik máselelerdi qamtydy. Eski saıabaqty qalpyna keltirý jobasy solardyń ishinde naqty jáne tııanaqty joba dep tanyldy.
Forýmda jastardyń oblys ákimi Nuraly Sádýaqasovpen kezdesýi ótti. Munyń ereksheligi road-show nysanynda, ıaǵnı ashyq áńgime, erkin sıpatta ótýinde edi. Onda jastar ákimge kez kelgen úsh suraqqa jaýap bermeýge «keńshilik» jasady. Alaıda, ákim jastar qozǵaǵan saýaldardyń barlyǵyna da jaýap berdi. Ashyq áńgimede jumys, oblystyq «Tobyl» fýtbol komandasynyń jaǵdaıy, ınternet, áleýmettik sala, joldar, jastar, taǵy basqa kóptegen ózekti máseleler qozǵaldy.
– Bizdiń elimizde kez kelgen másele tek sóz júzinde aıtylyp qana qoımaıdy, ol ómirde júzege asyrylady. Jastar saıasatyna qatysty da osyny aıtar edim. Elbasymyz Nursultan Nazarbaevtyń bastamasymen jas urpaqtyń bilim alýy, mamandyq ıgerýi, tárbıesi úshin qyrýar ister atqarylýda. Jastarda «bárin memleket sheshedi» degen masyldyq oı bolmaýy tıis. Memleket degen – sizder men bizdermiz, Qostanaı oblysy da – bárimiz. Júz adam shashqandy, eki adam jınasa odan eshqashan bereke bolmaıdy. Sondyqtan júrekte jalyn, kózde ot bolyp, árkim bir qadam bolsa da alǵa umtylǵanda ortaq tabysqa qol jetedi, – dedi oblys ákimi.
Forýmda jastar án men bıge, túrli qyzyqty oıyndarǵa da kezek berdi.
Názıra JÁRIMBETOVA,
«Egemen Qazaqstan».
Qostanaı oblysy.