Komıssııa tekserisi boıynsha elordada kópshilik sýǵa shomylatyn 23 oryn anyqtalǵan. Olardyń úsheýi ruqsat etilgen: Ortalyq jaǵajaı, "Trı peskarıa" jáne "Stolıchnyı dvor" demalys aımaqtary, 20-sy tyıym salynǵan oryndar, - dep jazady Nur-Sultan ákimdiginiń resmı saıty.
"Qalanyń tórt aýdanynda tegin kommýnaldyq jaǵajaılar ashý qolǵa alyndy. Olar: Almaty-3, Baıqońyr-1, Esil-3, Saryarqa-3 aýdandary", dep atap ótti TJD baspasóz qyzmeti.
9 mamyrdan bastap 141 tyıym salý belgisi men 20 aqparattyq stend ornatylǵan, 20 qalqyma belgiler de qoıylǵan, 14 qaıyq jáne súńgýirler kúndelikti kezekshilik etedi.
Ishki ister organdarynyń qyzmetkerleri men volonterler birigip 155 reıd júrgizdi. Sýda erejelerdi buzǵany úshin 64 adam ákimshilik jaýapkershilikke tartyldy. Qala mektepteriniń 3 250 oqýshysyna arnaıy alty ınteraktıvti sabaq ótkizildi.
Kún saıyn reıdtik sharalarǵa barlyq 23 ýchaske boıynsha tekseretin jeke quramdaǵy (TJD, DP, MG, volonterler) 80 adam qatysady. 1 maýsymda qala akvatorııasynda úsh adam qaza boldy. Eki adam qutqaryldy.
"Sýǵa shomylý kezeńinde azamattyq qorǵaý organdarynyń jeke quramy kúsheıtilgen qarqynda qyzmet atqarýda. Sonymen qatar karantın kezeńinde sanıtarlyq normalardy esepke ala otyryp, jappaı sýǵa túsý oryndaryna barý nusqaýlyǵy bekitildi. Sondaı-aq sýdaǵy qaýipsizdik erejeleri boıynsha tele jáne radıoda aqparat berilýde. Bul jumys kúsheıtilgen rejımde júrgiziledi jáne ol sýdaǵy oqys oqıǵalardy azaıtýǵa septigin tıgizedi", dedi basqarma.