Mıtıng uıymdastyrýshylardan qoǵamdyq tártip pen azamattardyń tynyshtyǵyn buzbaý talap etiledi. Bul týraly Memleket basshysy Qasym-Jomart Toqaev "Ana tili" basylymyna bergen suqbatynda aıtty, - dep habarlaıdy Egemen.kz.
"Beıbit jıyndar men mıtıngterge qatysý – Qazaqstan azamattarynyń konstıtýsııalyq quqyǵy. Ata zańymyzdyń kepili retinde azamattardyń quqyǵyn tolyq qamtamasyz etý – meniń mindetim. Bul jóninde byltyrǵy Joldaýymda aıttym. Parlament "Beıbit jıyndar týraly" jańa zań qabyldady. Qoǵamdyq saraptamadan ótken atalǵan zań – meniń oıymsha, elimizdegi demokratııany ilgeriletý úshin jasalǵan mańyzdy qadam", dedi Prezıdent "Ana tili" gazetine bergen suqbatynda.
Osy oraıda ol beıbit jıyndardy ótkizý úshin ruqsat suramaı-aq, bes kún buryn jergilikti bılikke eskertse jetkilikti ekenin aıtyp ótti.
"Osyndaı jıyndardy ótkizý úshin birqatar arnaıy oryn bólindi. Mıtıng uıymdastyrýshylardan qoǵamdyq tártip pen azamattardyń tynyshtyǵyn buzbaý talap etiledi. Sondaı-aq olar Konstıtýsııaǵa qaıshy keletin úndeýlermen shyqpaýy, ultaralyq jáne áleýmettik alaýyzdyq týǵyzbaýy qajet. Bul – qalypty jaǵdaı. Ásirese AQSh-ta jáne basqa da damyǵan elderde bolǵan sońǵy oqıǵalardy eskerý kerek", - dedi Memleket basshysy.