Memleket basshysy Qasym-Jomart Toqaev "Ana tili" basylymyna bergen suqbatynda "Beıbit jıyndar týraly" jańa zańdy negizsiz synǵa alǵandar jaıynda aıtty, - dep habarlaıdy Egemen.kz.
"Halyqaralyq quqyq qorǵaý uıymdarynan grant alatyn keıbir azamattarymyz qabyldanǵan zańdy negizsiz synaıdy. Olardyń pikirinshe, Qazaqstanda "Mıtıngke qashan shyǵamyn? Kimmen shyǵamyn jáne qaı jerde ótkizemin? Iаǵnı ózim bilem" degen júgensizdik qaǵıdaty bolýy kerek eken. Ásirese solardyń mıtıngige shetel azamattary men kámeletke tolmaǵan balalardyń qatysýyn talap etýin shekten shyqqandyq dep sanaımyn. Olardyń oıy belgili. Ondaı adamdarǵa tynyshtyq pen turaqtylyq qajet emes. Al biz qarqyndy damyǵan, tatýlyǵy jarasqan Táýelsiz Qazaqstandy saqtaýymyz kerek. Halyq eń aldymen el irgesiniń beriktigin tereń jaýapkershilikpen sezinýi kerek. Sonymen qatar memleket óz azamattarynyń zańdy talaptaryna qulaq asýǵa, qarjylyq jáne quqyqtyq múmkindikter aıasynda olarǵa járdem berýge mindetti", - dedi Memleket basshysy "Ana tili" gazetine bergen suqbatynda.
Sondaı-aq ol jastar úshin áleýmettik lıft ornyqtyrý kerek ekenin sóz etti.
"Memlekettik basqarý isindegi jáne ıdeologııa salasyndaǵy qatelikterdi der kezinde túzetken jón. Eger jumys osylaı júretin bolsa, sózsiz ádildik ornaıdy. Men muny saılaý aldyndaǵy baǵdarlamamda aıtqan bolatynmyn. Sonda mıtıngtiń de qajeti bolmaı qalady. Sońǵy kezderi elimizde "mıtıngshildik" beleń alýda. Kóbinese azamattarymyz syrttaǵy bireýlerdiń arandatýshylyq urandaryna erip júr. Bul – aımaqtyq básekelestik kúsheıip kele jatqan halyqaralyq arenada Qazaqstandy yńǵaısyz jaǵdaıǵa qaldyryp otyr", - dedi Prezıdent.