21 maýsymda búkil respýblıka boıynsha mektep oqýshylary ómirindegi basty oqıǵalardyń biri - ulttyq biryńǵaı testileý bastaldy. Bul testileýdiń sátti ótýiniń arqasynda túlekterdiń joǵary oqý oryndarynda ári qaraı aqyly nemese memlekettik granttyń negizinde tegin bilim alýy anyqtalady, dep jazady Egemen.kz
Testileýdiń ashyqtyǵy men obektıvtiligin qamtamasyz etý úshin Bilim jáne ǵylym mınıstrliginiń buıryǵymen elimizdiń barlyq aımaqtarynda jumys toby quryldy. Onyń quramyna arnaıy monıtorıng top, "Adaldyq alańy" jobalyq keńsesiniń ókilderi jáne Agenttik qyzmetkerleri kirdi.
Bul toptyń negizgi maqsaty testileýdiń "tazalyǵyn" baqylaý bolyp tabylady. Qandaı da bir sáıkessizdikter nemese testileý erejeleri buzylǵan jaǵdaılar anyqtalǵanda, olar bul týraly jaýapty tulǵalarǵa habarlaýǵa mindetti.
Mańǵystaý óńirinde Aqtaý, Jańaózen qalalarynda jáne Mańǵystaý, Beıneý aýdandaryndaǵy pýnktterde UBT ótkizilýde. Mańǵystaý aýdany boıynsha UBT sharasy óz máresine jetip, qalǵan pýnktterde odan ári test jalǵasýda. Qoǵam belsendilerinen quralǵan baqylaýshylar osy atalǵan pýnktterde test suraqtary salynyp kelgen qaptardyń ashylý sátinen bastap, talapkerlerdiń jaýaptary skanerlenýine deıingi barlyq prosesti baqylaýda ustaıdy.
21-24 maýsym aralyǵynda UBT qatysýǵa nıet bildirgen 2603 talapkerlerdiń metalizdegish qurylǵysynyń kómegimen anyqtalǵan ruqsat etilmegen qurylǵylardy ózimen birge alyp kirmek bolǵan 50 talapker testileýden shettetilse, testileý erejesin buzǵany úshin aýdıtorııadan 56 talapker shyǵarylyp, nátıjeleri joıyldy.
Sonymen qatar, testileý ótkizilgen árbir aýdıtorııanyń beınejazbalary Ulttyq biryńǵaı testileý ortalyǵyna joldanyp, sarapshylar jazbalardy aǵymdaǵy jyldyń 25 tamyzyna deıingi aralyqta qaıta taldap qaraıtyn bolady. Eger qandaı da bir ereje buzýshylyqtar men ruqsat etilmegen qurylǵylar anyqtalǵan jaǵdaıda talapkerdiń testileý qorytyndylary joıylady. Osyǵan baılanysty Agenttik oqýshylardy tek óz bilimderine ǵana súıene otyryp, test tapsyrýǵa shaqyrady, al ata-analardy testileý qorytyndysy boıynsha oń baǵa alý maqsatynda para bergeni úshin qylmystyq jaýapkershilik jáne bas bostandyǵynan aıyrý kózdelgenin eskertedi.