Ortalyq kommýnıkasııalar qyzmetinde Eńbek jáne halyqty áleýmettik qorǵaý mınıstri Birjan Nurymbetov onlaın-rejimde halyqqa esep berý kezdesýin ótkizdi. Jıyn barysynda vedomstvo basshysy ártúrli áleýmettik saladaǵy atqarylǵan aýqymdy sharalarǵa toqtaldy.
Mınıstr memleket halyqqa zeınetaqy men járdemaqy túrindegi áleýmettik tólemderdiń 39 túrine kepildik beretinin jáne jumys isteıtin azamattar mindetti áleýmettik saqtandyrý júıesinen 5 áleýmettik táýekel boıynsha tólem alatynyn alǵa tartty.
Onyń aıtýynsha, «Mindetti áleýmettik saqtandyrý týraly» zańdy iske asyrý sheńberinde 2020 jylǵy 1 qańtardan bastap Memlekettik áleýmettik saqtandyrý qorynan tólenetin tólemder mólsheri: eńbek etý qabiletinen aıyrylǵan jaǵdaıda – 74,4 myń adam úshin 69%-ǵa, asyraýshysynan aıyrylǵan jaǵdaıda – 44,8 myń adam úshin 41%-ǵa, jumysynan aıyrylǵan jaǵdaıda – 2,5 myń adam úshin 44%-ǵa ulǵaıdy. Mindetti áleýmettik saqtandyrý júıesinen 194,2 mlrd teńge somasyna 825,2 myń adam tólem aldy.
Bıyl 1 qańtardan bastap yntymaqty zeınetaqylar 7%-ǵa, bazalyq zeınetaqylar 5%-ǵa ulǵaıdy. 1 sáýirden bastap zeınetaqynyń eki túri taǵy 5%-ǵa arttyryldy. Nátıjesinde, yntymaqty zeınetaqy mólsheri jyldyq mánde –12%-ǵa, bazalyq zeınetaqy mólsheri – 10%-ǵa ulǵaıdy.
Aıta ketetin taǵy bir jaıt, respýblıkalyq bıýdjetten jáne Memlekettik áleýmettik saqtandyrý qorynan balaly otbasylardy áleýmettik qoldaýǵa arnalǵan shyǵystar 2019 jylmen salystyrǵanda 209,5 mlrd teńgege ósti. 2019 jyly osy maqsattarǵa 372 mlrd teńge jumsalsa, 2020 jyly balalary bar otbasylardy qoldaýǵa jalpy 581,5 mlrd teńge bólinip otyr.
Sonymen qatar mınıstrlik ataýly áleýmettik kómek kórsetý tetikterin jetildirýdi josparlap otyr eken.
«Bir jarym jyldan az ýaqyt ishinde AÁK kórsetý tetikteri eki ret jetildirildi. 2019 jylǵy 1 sáýirden bastap AÁK taǵaıyndaý krıterııi eń tómengi kúnkóris deńgeıinen 50%-dan 70%-ǵa deıin (14 849-dan 20 789 teńgege deıin) kóterildi. 2020 jylǵy 1 qańtardan bastap ataýly áleýmettik kómek kórsetýdiń jańa modeli engizildi, bul mynalardy qarastyrady: 4 jáne odan da kóp balasy bar otbasylarǵa memlekettik járdemaqy tóleý (ár balaǵa aıyna ortasha 11 112 teńgeden), AÁK kórsetý (balalardy qosa alǵanda, otbasynyń árbir múshesine aıyna ortasha 11 117 teńgeden), tabysy az otbasylardyń balalary úshin kepildik berilgen áleýmettik toptama usyný (1 jastan 6 jasqa deıingi balalar úshin azyq-túlik jáne turmystyq jıyntyq, 6 jastan 18 jasqa deıingi balalar úshin mektep formasy men oqýǵa kerek-jaraqtar, mektepte tamaqtaný, jeńildikpen jol júrý). Sondaı-aq AÁK alýshylarǵa Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyn iske asyrý sheńberinde ómirlik qıyn jaǵdaıdan shyǵý úshin keń múmkindikter berildi. Naqtyraq aıtsaq, tegin oqytý, jumysqa ornalastyrý, óz isin ashý úshin qaıtarymsyz granttar men mıkrokredıtter berý», dedi B.Nurymbetov.
Buǵan qosa, ol múgedektigi bar adamdarǵa qoldaý kórsetý – mınıstrlik jumysynyń eń basty basymdyqtarynyń biri. Máselen, erekshe qajettilikteri bar adamdardy áleýmettik qoldaýdy kúsheıtý jáne olardy qoǵam ómirine tartý maqsatynda 19 normatıvtik-quqyqtyq aktige ózgerister engizilgen, dedi.