Parlament Senaty depýtattarynyń pikirlerinshe, avıakompanııaǵa qatysty janjaldardyń barlyǵynda birdeı jolaýshylar kináli bolyp shyǵa bermeıdi. Kompanııa personalyna ártúrli jaǵdaılarǵa beıimdilik tanytyp, qazaq tilin jaqsy bilýleri tıis. Bul týraly Tengrinews.kz tilshisi habarlady.
Senatorlar «Eır Astananyń» personalyn jurtty janjalǵa ózderi arandatatyny úshin aıyptady. «Biz udaıy ushaqtarmen ushyp turamyz. Men ózimniń jeke tájirıbem arqyly bilemin, shet elderge baratyn bolsaq, túrik nemese arab avıajelileriniń ushaqtaryna bılet alýǵa tyrysamyz. Jalpy, tym bolmaǵanda qyzmet kórsetý deńgeıiniń ózi tómen bolǵandyqtan, «Eır Astanaǵa» tap kelmeýge umtylamyz. Bularda birinshi kezekte qandaı sátterge tap bolýǵa bolady? Bylaıynsha, erejeniń bári óziniń retindegideı bolyp oryndalatyn sııaqty, biraq ómirlik jaǵdaılar degen bar, solarǵa kelgende, bular apyraqtap qalady. О́kinishke oraı, ásirese, «Eır Astananyń» qyzmet kórsetýshi personaly kóp jaǵdaıda janjalǵa ózderi bastamashy bolyp jatady», - dedi senator Qaısar Omarov Kólik jáne kommýnıkasııa mınıstrimen kezdesý kezinde.
Budan keıin ol bir jaǵdaıdy eske túsirdi. «Júkterdi tirkeý júrip jatyr. Bizdiń bárimiz bir orynǵa ruqsat etiletin júktiń salmaǵy 30 kılo ekenin jaqsy bilemiz. Al bir adamnyń júgi 32 kılo bolyp shyqty. Sosyn tekserýshiler álgi kisini ábden muqııattap salǵan júgin buzyp, artyq 2 kılony alyp tastaýǵa májbúr etti. Basqa avıajelilerde men mundaıdy kórgen emespin. Bul baryp turǵan janjal týǵyzatyn jaǵdaıı ǵoı. Bylaıynsha usaq-túıek nárse, biraq osyndaılar bul áýe jelilerinde ushqyń kelmeıtin ahýaldy týǵyzady», - dep atap ótti Qaısar Omarov.
О́z kezeginde «Eır Astana» AQ basshysy Pıter Foster kompanııada personaldy oqytýdyń udaıy júrgizilip turatynyn jetkizdi.
«Men sizder aıtqan eskertpelerdiń bárin qabyldaımyn. Biz bul máselelerdi zertteıtin bolamyz. Júkke qatysty sizdiń aıtqandaryńyz óte durys, sebebi, ádettegi praktıkada júktiń 3-4 kıloǵa deıin eki jaqqa da aýytqıtyny ras. Kompanııa árdaıym qajetti prosedýralardyń balansyn saqtaýǵa umtylady. Biz qyzmetkerlerimizdi kez kelgen ómirlik sıtýasııalarǵa beıim bolýǵa úıretemiz», - dedi ol.
«Men bortserikteriniń narazylyq bildirýdiń mundaı ádisin qoldanýlaryn qoldamaımyn. Bul kisiler ózderiniń áreketteri arqyly búkil qoǵamǵa kóleńke túsiretinderin umytpaýlary kerek. Halyqtyń kópshiligi stıýardessalar memlekettik tildi bilmeıdi degenmen kelisedi. Men ózi aptasyna tórt ret ushamyn, baıqaıtynym, kóbisi tildi bilmeıdi. Sizder olarǵa memlekettik tildi úıretesizder me, joq pa?», - dep surady senator Sársenbaı Eńsegenov.
Al «Eır Astana» AQ prezıdenti Pıter Foster olardyń tildi oqytý kýrstarynan ótetinin aıtyp sendirdi.
«Habarlama aldymen qazaqsha, sosyn oryssha, sońynan aǵylshynsha aıtylady. Bul tártip ushaqqa ilinip qoıylatyn barlyq kesteler men aqparattarda saqtalady», - dedi prezıdent.
Sáken Maılybaı.