Elimizde "Qarapaıym zattar ekonomıkasy" baǵdarlamasy ázirlenip, ótken jyldyń aqpan aıynan iske asa bastady, dep habarlaıdy Egemen.kz.
Biraq, turǵyndardyń kóbi óziniń jeke bıznesin bastaýdy qalasa da, qaıda barý kerektigin bilmeıdi.
Eger jergilikti jerdegi kásipkerlik palatasyna barý kerektigin bilse, bıznes-jospar jasaýdan qarjy alǵanǵa deıin keńes alar edi.
Ekinshiden, ekinshi deńgeıli bankterdiń fılıaldaryna baryp, zańdy tulǵalarǵa qyzmet kórsetý bóliminiń kómegine júginesiz. Osy oraıda kez kelgen banktiń qoıar ishki talaptary baryn da eskerý kerek.
Osy kezeńnen ótkennen keıin ǵana "Qarapaıym zattar ekonomıkasy" baǵdarlamasynyń tolyqqandy qatysýshysy atanyp, bıznes josparyńyzdy júzege asyra alady.
Baǵdarlama barysynda tamaq ónimderi, kıim-keshek, dári-dármek, qurylys materıaldary,jıhazdar shyǵaratyn kásiporyndarǵa tıimdi tetikterdi paıdalanýǵa múmkindik berildi.
Bul 6 paıyzdyq mólsherlememen nesıe alyp, ony kásipti bastaýǵa, keńeıtýge, qarjy aınalymyn toltyrýǵa paıdalaný degen sóz.
Mysaly, óńirimizde ótken jyly jalpy quny 14,7 mlrd. teńge bolatyn 66 joba maquldanǵan.
Biraq, 66 jobanyń 57-si mal basyn kóbeıtý, agroónerkásiptik keshendi keńeıtý maqsatynda qarjylandyrylǵan.
Al, tamaq ónimderin óndirý, týrızm, kólik, qurylys, jıhaz jasaý sııaqty basqa da salalarǵaqatysty jobalar bolmaǵan.
О́kinishke qaraı, qarjynyń barlyǵy derlik "Eńbek", "Sybaǵa" syndy baǵdarlamalar arqyly aýyl sharýashylyǵyna bólingen.
Sondaı-aq, Tótenshe jaǵdaı rejıminde kásipkerlerdiń birazy qıyndyqqa tap bolǵanyn eskere kele, "Qarapaıym zattar ekonomıkasynyń" kepildendirýge qatysty baǵytyna ózgerister de engizildi.
Buǵan deıin quny 3-5 mlrd. teńgelik jobalardyń 20 paıyzyna kepildik berilse, endi 30 paıyzǵa deıin kepildik beriletini habarlandy.
Oblystyq kásipkerlik jáne saýda basqarmasynyń basshysy Jaıyq Hasanovtyń aıtýynsha, budan bylaı kúrish ósiretin, nan-toqash, kondıterlik ónimderdi pisiretin, jeńil metall qurylymdaryn shyǵaratyn, kran, lıftiler sııaqty kóterý quraldaryn daıyndaıtyn, agroónerkásiptik keshen salasynda qaıta óńdeýmen aınalysatyn kásiporyndar da baǵdarlamanyń múmkindikterin paıdalana alady.
Buǵan deıin atalmysh baǵyttar ózge baǵdarlamalar aıasynda az kólemdegi jeńildetilgen nesıeler men qaıtarymsyz qarjylardy ǵana alyp kelgen edi.
- Turǵyndar "Qarapaıym zattar ekonomıkasynyń" tıimdiligin túsingen bolýy kerek, qatysýǵa nıettiler qatary artyp keledi. Jyl basynan beri jalpy somasy 4,4 mlrd. teńge bolatyn 16 joba maquldandy. Ekinshi deńgeıli bankterdiń qaraýynda taǵy 20-dan astam joba bar. Odan bólek, jobalyq keńse 193 jobany jan-jaqty talqylap, ázirleýde, - deıdi J.Hasanov.
Biraq, máseleniń bári sóz , esep júzinde ǵana jaqsy sııaqty. Naqty is barysy áli baıqalmaıdy.
Pavlodar oblysy