Eldiń ornyqty damýy úshin memlekettiń básekege qabilettiligin arttyrý jáne ártaraptandyrý boıynsha tereń qurylymdyq reformalar qajet. Bul týraly Prezıdent janyndaǵy Qazaqstannyń strategııalyq zertteýler ınstıtýtynyń Áleýmettik-ekonomıkalyq zertteýler bóliminiń aǵa ǵylymı qyzmetkeri Anna Alshanskaıa aıtty.
«Alty aıdan beri álemniń barlyq elderi buryn-sońdy bolmaǵan COVID-19 vırýsymen kúresip, álemdik ekonomıka pandemııa saldarynan aýyr zardap shegip otyr. Dúnıejúzilik bank boljamyna sáıkes 2020 jyly jahandyq IJО́ 5,2% tómendeıdi dep kútilýde. Sonymen qatar qazirgi daǵdarystyń ereksheligi – onyń qanshaǵa sozylarynyń belgisiz ekendigi. Pandemııanyń uzaqtyǵy kóptegen faktorǵa – vaksınanyń jasalýyna, «ujymdyq ımmýnıtettiń» qalyptasýyna, vırýstyń yqtımal órshýine, sonymen qatar memleketterdiń shuǵyl áreketteriniń tıimdiligine baılanysty», deıdi sarapshy. Onyń aıtýynsha, bul pandemııa bizdiń elge de óz yqpalyn tıgizip otyr. Mysaly, 2020 jyldyń birinshi jarty jylynda Qazaqstannyń IJО́ 1,8%-ǵa tómendegen. Ásirese qyzmet kórsetý sektory pandemııa áserin aıryqsha sezindi, bul kezeńde óndiris 5,6% tómendegen. Karantındik sharalar men shıkizat naryǵyndaǵy turaqsyzdyq saldary eldiń bıýdjettik júıesine de áser etti – bıýdjettiń shyǵyny shamamen 1,7 trln teńgeni qurady. Koronavırýstyq pandemııa eńbek naryǵyna da yqpal etti. Eńbek jáne halyqty áleýmettik qorǵaý mınıstrliginiń málimeti boıynsha jumyspen qamtý organdarynda 2020 jyldyń mamyr aıynyń sońynda jumyssyz retinde tirkelgender sany 161,3 myń adamdy nemese jumys kúshiniń 1,7%-yn quraǵan.