Qazaq eli qajyrly qalamger, qasterli perzentimen qoshtasty. Memlekettik syılyqtyń laýreaty Qajyǵalı Muqambetqalıulynyń jetpis segiz jasynda jer betindegi sapary aıaqtaldy. Aqtóbe óńiriniń Qyzylbulaq aýylynan bastalǵan jastyqtyń jalǵyzaıaq soqpaǵy eren eńbektiń, eldik murattyń, elge degen mahabbattyń, keńdik pen kisiliktiń, tazalyq pen tulǵalyq bolmystyń, tolǵamy tolymdy, jazǵany mol úlken júrekti jazýshynyń jolyna aınaldy.
Qazaq ádebıetine qýatty qalamymen qaltqysyz qyzmet etken, el ómiriniń eleýli kezeńderin, týǵan ólkeniń tolǵaýly tarıhyn, ilki zamannyń, irgeles jyldardyń irkes-tirkes oqıǵalaryn oramdy oı, ornyqty sózben beınelegen sýretkerdiń ýaqyt kerýenine artqan murasy da az emes.
Jazýshy qalamynan týǵan shyǵarmalar ózeginen kúresker halyqtyq rýhtyń baıanyn, qoǵam ómiriniń júlgesi úzilmegen jarqyn shejiresin kóremiz. Ár jyldar bederinde «Juldyzdy túnder», «Toǵaı sybdyry», «Jańǵyryq», «Qaıdasyń sen, mahabbat?», «Synyq tereze», «Jalǵyz jıen» sekildi áńgimeler men povester jınaqtaryn, álem jazýshylary shyǵarmalarynan tárjimalaryn usynsa, «Tar kezeń» tarıhı romany úshin Memlekettik syılyqty aldy.
Aqtóbe oblystyq televızııa jáne radıo komıtetinde, oblystyq gazette ádebı qyzmetker, «Qazaqstan» baspasynda aǵa redaktor, «Juldyz» jýrnalynda bólim meńgerýshisi, «Qazaq ádebıeti» gazetinde jaýapty hatshy, «Jańa fılm» jýrnalynda bas redaktor qyzmetterin atqardy.
Kórnekti qalamger qazasyna qaıǵyra otyryp, otbasyna, týǵan-týystaryna kóńil aıtamyz.
Egemenqazaqstandyqtar