Túrkistan oblysynyń polıseıleri týysynyń atynan onlaın nesıe alǵan qyzdy ustady. Bul týraly Polisia.kz-ke silteme jasaı otyryp Egemen.kz habarlaıdy.
Qazyǵurt aýdandyq polısııa bólimshesine jergilikti turǵyn aryzdanady. Jábirlenýshi áıeldiń aıtýynsha, beıtanys adam onyń atynan 60 myń teńge onlaın-nesıe alǵan. Eki jylda qaryzy 300 myń teńgeden asyp ketken. Atalǵan jaıt SDTTBT-ne engizilip, QR QK-niń 190-baby "Alaıaqtyq" boıynsha tirkeldi. Aryzdanýshynyń shaǵymyna sáıkes, alaıaqtyń qylmysyn ashyp, kúdiktini anyqtaý maqsatynda Qazyǵurt aýdany polıseıleri qajetti is-sharalardy júrgizdi.
Tekserý jumystarynyń nátıjesinde polıseıler osy qylmysqa qatysty kúdiktini ustady. Ol jábirlenýshiniń týys qaıyn sińlisi bolyp shyqty. Tergeý barysynda anyqtalǵandaı, jábirlenýshi 2018 jyldyń shilde aıynda qaıyn sińlisinen onlaın-nesıe alýǵa ótinish tastap berýin suraǵan.
Sonan soń kúdikti boıjetkende jymysqy oı paıda bolyp, ol jábirlenýshiniń atyna onlaın nesıe resimdep, maquldaýdy alǵannan keıin, aqshanyń bir bóligin ıemdengeni belgili boldy. Kúdiktiniń bas sharasy mindettememen bosatyldy. Qazirgi tańda sotqa deıingi tergeý amaldary júrgizilip jatyr.
Túrkistan oblysynyń polıseıleri turǵyndarǵa: ózińizge qatysty jeke, qupııa sandardy eshkimge bermeńizder dep eskertedi. Banktik kartochkalaryńyz men jeke kýáligińizge, jalpy qujattaryńyzǵa uqypty bolyńyzdar. Eger, osyndaı ınternet-alaıaqtyǵynyń kýási nemese qurbany bolsańyz, tez arada polısııanyń "102" telefonyna habarlasyńyzdar.