Medısınalyq jabdyq alýǵa kómektesti

Dúnıeni dúrliktirgen pandemııaǵa qarsy kúres elimizde jalpyhalyqtyq maıdanǵa aınaldy. Jurt bolyp jumylyp, dárigerlerge dem berýshi, aýrýhanalarǵa kómektesip jatqan aǵaıyn kóp.

– Koronavırýs pandemııasyna qarsy kúreske kásipkerlerimiz taǵy da jumyldy. Bizge ákelingen 10 lıtrlik ottegi konsentratorlary – aýrýhanaǵa aýyr jaǵdaıda túsken naýqastar úshin óte qajetti qondyrǵylar. Pýlsoksımetr quraly naýqas qanynyń qura­­myndaǵy ottegi mólsherin anyqtap, dál dıagnos­tıka qoıýǵa taptyrmas kómekshi. Dál qazir oblystyq aýrýhanadaǵy provızorlyq stasıonarda 148 naýqas jatyr. Olardyń 80 paıyzy ottegi konsentratoryna qosylǵan. Al 10-15 paıyzy ókpeni jasandy tynystandyratyn apparattyń kómegine muqtaj. Aıta ketetin jaıt, naýqastardyń kóbi úıde emdelip, 10-12 kún ýaqyt ótkizip, aýrýdy asqyndyryp keledi. Osy jerde ǵana naqty dıagnozy anyqtalyp, kásibı medısınalyq járdem alady, – deıdi oblystyq kópbeıindi aýrýhana dırektory.

Medısınalyq jabdyqtar Reseı Federasııa­synan ákelingen. Kórshi memleketpen aradaǵy keli­simderge sáıkes qajetti quraldar jeńil­dikpen, jedel jetkizilýde.

– Elde osyndaı qıyn jaǵdaı bolyp jatqanda biz, kásipkerler, qarap qara almadyq. Biz – elmen birgemiz. «Baı bolsań, elge paıdań tısin» degen ataly sózdi eskerip, óz álimizshe azdy-kópti qarajat bólip, indetke qarsy kúreste kerekti qural-jabdyqtardy jetkizip jatyrmyz. Osy bastama ózge áriptesterimizge de úlgi bolsa deımiz. Indetti birge eńsereıik! – deıdi kásipkerler atynan sóz alǵan Dıdar Ásetov.

Oblystyq ishki saıasat basqarmasy bas­shy­synyń orynbasary Darhan Qany­bek­ulynyń aıtýynsha, «Aqjaıyq» qoryna osy kezge deıin oblys kásipkerlerinen 100 mln teńgeniń ústinde qarajat aýdarylǵan. Munyń bári ortalyqtandyrylǵan satyp alý júıesi boıynsha koronavırýs indetimen kúreske qajetti dári-dármek pen jabdyqtar alýǵa jumsalýda. Jaqynda ǵana 160 ottegi konsentratory Máskeý qalasynan Oralǵa jetkizilip, tıisti emdeý mekemelerine taratyldy.

Batys Qazaqstan oblysy