Qazaqstan men Reseı Jambyl oblysynda mıneraldyq tyńaıtqyshtar shyǵaratyn zaýyt salý jáne ony paıdalaný boıynsha "EýroHım" mıneraldyq-hımııalyq kompanııasy" jobasyn iske asyrý týraly úkimetaralyq kelisimge qol qoıdy, dep habarlaıdy Egemen.kz
Joba Qazaqstan Respýblıkasynyń ońtústigindegi Qarataý fosfor basseıniniń ken oryndaryn ıgerýdi jáne mıneraldyq tyńaıtqyshtar shyǵaratyn jańa zaýyt salýdy kózdeıdi. Jobanyń jalpy quny 1,2 mıllıard AQSh dollaryn quraıdy.
"Hımııalyq kásiporynnyń jumysy Jambyl oblysynda keminde 1200 jańa jumys ornyn qurý múmkindigin qamtamasyz etedi, sonymen qatar aýyl sharýashylyǵy men qurylys salasynyń damýyna aıtarlyqtaı túrtki bolady, azyq-túlik qaýipsizdigin joǵarylatýǵa, Qazaqstan Respýblıkasynyń eksporttyq áleýetin arttyrýǵa yqpal etedi, Qazaqstan men Reseı arasyndaǵy ıntegrasııalyq bıznes-baılanystardy eleýli túrde nyǵaıtady", dep túsindirdi Ermek Kósherbaev.
Salynǵaly jatqan hımııalyq kásiporynda dástúrli fosfor óndiristeriniń negizgi kemshilikteriniń biri - fosforly gıps túrindegi qaldyqtar bolmaıdy, bul tabıǵı resýrstardy paıdalaýdyń tıimdiligin jaqsartyp, óńir ekologııasyn saqtaıdy. Budan basqa, joba onyń barlyq qatysýshylaryna uzaqmerzimdi áleýmettik-ekonomıkalyq áser ákelmek.
"Qol qoıylǵan úkimetaralyq kelisim strategııalyq ınvestısııalyq jobany iske asyrýda jańa kezeńdi bastaıdy – jumys istep turǵan óndiristi keńeıtip, hımııa salasyndaǵy eń úzdik qoljetimdi tehnologııalardy paıdalanýmen jylyna keminde 1 mıllıon tonna mıneraldy tyńaıtqysh pen ındýstrııalyq ónimder óndiretin jańa zaýyttyń qurylysyn bastaýǵa kóshýge múmkindik beredi. Zaýyttyń qurylysyn 2025 jylǵa qaraı aıaqtaý josparlanyp otyr", dep atap ótti Denıs Mantýrov.
Bul joba Respýblıkalyq ındýstrııalandyrý kartasyna engizilgen jáne 2019 jylǵy sáýirde Sarysý aýdanynda zaýyttyń muqtajdyqtary úshin qýattylyǵy 110 myń sharshy m/saǵ. gaz qubyrynyń qurylysy bastalǵan. Investısııalyq jobany «EýroHım» mıneraldyq-hımııalyq kompanııasy» AAQ-tyń Qazaqstandaǵy enshiles kompanııasy «Eýrohım – Qarataý» JShS iske asyratyn bolady.