Túrkistan oblysynda ýchaskelik polısııa ınspektorynyń jedel-áreketi arqasynda buzaqylyq toqtatyldy. Bul týraly IIM baspasóz qyzmetine silteme jasaı otyryp Egemen.kz habarlaıdy.
Esterińizge sala ketsek, Kentaý qalasyna qarasty Shornaq aýylynda er adam men aýyldasynyń arasynda túsinbeýshilik oryn alyp, sońy buzaqylyqqa ulasqan. Iаǵnı jábirlenýshiniń úıine birneshe avtokólikpen belgisiz adamdar kelip, onyń úıi men kórshileriniń aýlasyna qaraı tas laqtyrǵan. Nátıjesinde, jábirlenýshiniń úsh týysy jaraqat alyp, dereý aýrýhanaǵa jetkizilip, medısınalyq kómek kórsetilgen.
Atalǵan aqparatty alysymen oqıǵa ornyna alǵashqylardyń biri bolyp, osy aımaqqa belgilengen ýchaskelik polısııa ınspektory Nurlan Quralbaev jetken. Ol aýyl turǵyndary arasyndaǵy túsinbeýshilikti toqtatyp, turǵyndardyń qarý qoldanýyna jol bermedi.
Osylaısha, ýchaskelik polısııa ınspektorynyń jedel áreket etip, durys jumys júrgizgeniniń arqasynda daý-damaı men buzaqylyqty toqtatyp, adam shyǵynynyń bolýyna jol bermedi. Alaıda, óz qyzmetin atqarý barysynda polıseı kúdiktiler laqtyrǵan tastan jaraqat alyp, aýrýhanaǵa jetkizilip, oǵan medısınalyq kómek kórsetilgen.
Túrkistan oblystyq polısııa departamentiniń basshylyǵynan qurylǵan jedel-tergeý toby bir táýlik ishinde osy buzaqylyqqa qatysy bar tórt turǵyndy ustady. Qazirgi tańda sotqa deıingi tergeý amaldary júrgizilip jatyr.