Qazaqstannyń Ekologııa, geologııa jáne tabıǵı resýrstar mınıstri Maǵzum Myrzaǵalıev Aqtóbe oblysynda jumys saparymen júr. Onda ol "Qazhrom" TUK Aqtóbe ferroqorytpa zaýytynyń óndiristik alańyna baryp, sondaı-aq óńirdegi ırrıgasııalyq ınfraqurylymdy jańǵyrtý jumysymen tanysty. Bul týraly ol óziniń Twitter-degi paraqshasynda jazdy, - dep habarlaıdy Egemen.kz.
"Men Aqtóbe oblysynda jumys saparymen júrmin. Bir kún buryn "Qazhrom" AFZ-nyń óndiris alańyn araladym. Kompanııa basshylyǵyna N1, 2 sehtarynyń qaldyqtaryn 30%-ǵa azaıtý jónindegi alǵan mindettemelerin múmkindiginshe tezirek oryndaý qajettigin nusqadym", - dep jazdy mınıstr jumada.
"Sonymen qatar, "Qazhrom" jalǵa alǵan merdiger kompanııalardyń jumystardy oryndamaýy saldarynan jınaqtalǵan qaldyqtardy tıisti dárejede uqsatý úshin jedel sharalar qabyldaýy kerek", - dep tolyqtyrdy Ekologııa mınıstri.
Mınıstrdiń aıtýynsha, osy jáne basqa da máseleler mınıstrliktiń kelesi aptadaǵy jıynynda qaralady.
"Sondaı-aq oblystaǵy sý resýrsynyń jaǵdaıyn, óńirdegi ırrıgasııalyq ınfraqurylymdy qurý jáne jańǵyrtý jumysynyń barysymen tanystym. О́ńirde bul jumystardyń oń nátıjesi bilinedi: fermerler jańa jerlerdi ıgerýde, jońyshqa eginin kóbeıtýde (jylyna 4 ret ónim alady), shıkizatty óńdep, eksportqa jiberýde. Sondaı-aq, sút fermalaryn damytý josparlanǵan. Aldaǵy mindet - oblystaǵy sýarmaly jerlerdi 32 900-den 69,967 ga-ǵa deıin ulǵaıtý" , - dedi Myrzaǵalıev.