Nur-Sultanda 5 shildeden bastap engizilgen karantın sharalary men ambýlatorııalyq emdeýdi kúsheıtý nátıjesinde pnevmonııamen aýrýhanaǵa túskender sany 40,5% – 1348-den 793-ke deıin azaıdy. Sonymen qatar koronavırýs stasıonarlaryna túsken naýqastar sany 50,3%-ǵa azaıdy, - dep habarlaıdy Egemen.kz qala ákimdiginiń resmı saıtyna silteme jasap.
"Karantın sharalary, emhanalarda ambýlatorııalyq emdeýdi kúsheıtý jáne qala turǵyndarynyń sanıtarııa normalaryn qatań saqtaýy densaýlyq saqtaý júıesine, dárigerlerge júktemeni aıtarlyqtaı tómendetti. Jedel járdem stansııasyna qońyraýlar sany eki eseden astam azaıdy – táýligine 2400-den 1129-ǵa deıin (52,3%). Sonyń ishinde KVI boıynsha – kúnine 350-den 112-ge deıin. Karantınge deıin, koronavırýstyń aýyr dárejesimeni naýqastar medısına mekemelerine birinen soń biri túsip jatatyn – dárigerler fızıkalyq, moraldyq turǵydan óte aýyr tıdi. Densaýlyq saqtaý mamandary ár naýqas úshin sońyna deıin kúresti. Qazir aýyr naýqastar sany azaıdy. Eki kún buryn dárigerlerimiz ókpesi 100%, 90% qabynǵan naýqastardy emdep shyǵardy. Azamattardan karantın alynyp tastalǵannan keıin de ınfeksııanyń aldyn alý úshin sanıtarııa normalaryn qatań saqtaýdy suraımyz", – dedi densaýlyq saqtaý basqarmasy basshysynyń mindetin atqarýshy Álııa Rústemova.
Osylaısha, KVI-den emdelip shyqqandar sany 67%-dy qurady – 9494 naýqastyń 6607-i saýyǵyp shyqty. Tósek-oryn qorynyń júktemesi 90%-dan 47%-ǵa azaıdy.