Búgin QR Aqparat jáne qoǵamdyq damý mınıstri Aıda Balaevanyń tóraǵalyǵymen onlaın formatta "Ekologııalyq bilim: qazaqstandyq qoǵamda ekologııalyq bilim berý, ekologııalyq mádenıet qalyptastyrý" taqyrybynda dóńgelek ústel otyrysy ótti, - dep jazady Egemen.kz
Búgingi kúnniń kókeıkesti máselesiniń biri – qorshaǵan ortanyń tazalyǵyn qozǵaǵan jıynda ekologııalyq saýattylyq máselesine asa mán berildi. "Adam aýrýlarynyń qorshaǵan ortadaǵy keleńsiz ózgeristerge tikeleı nemese janama túrde baılanysty ekeni belgili. Biraq halyqtyń naýqastanýynyń ekologııalyq faktorlary men sebep-saldarlaryna ázirge elimizde jetkilikti deńgeıde nazar aýdarylmaı otyr. Ekologııalyq saýatsyzdyqty joıý halyq arasynda júrgiziletin mańyzdy máselege aınalýy tıis. Tabıǵat pen qorshaǵan ortany qorǵaýdyń joldary jalpyhalyqtyq ekologııalyq saýatty ashý, jastarǵa úzdiksiz bilim berý nátıjesinde ǵana sheshiledi", - dedi Balaeva. Mınıstr sońǵy kezde biregeı tabıǵı oryndarda jasalǵan qatigez jaǵdaılar tabıǵattyń kúıreýine ákeletinin aıtty. Dóńgelek ústel otyrysynda qoǵam qaıratkeri Arman Haırýllın 2021 jyldy "Ekologııa jyly" dep jarııalaý týraly usynys tastady. Qoǵamda qordalanyp qalǵan ekologııalyq máseleler qyzý talqylanǵan jıyndy qorytyndylaǵan mınıstr A.Balaeva: "Tabıǵat resýrstaryn tıimdi paıdalanýdy, ony qorǵaýdy uıymdastyrý baǵytynda keshendi tásil qajet. Jerdiń sulýlyǵy men baılyǵyn qorǵaýdy jan-tánimen jaqtaıtyn adamdar men tabıǵatty keshendi paıdalaný ıdeıasyn ómirge engizý men aınalysatyn mamandardyń arasynda jer men kókteı aıyrmashylyq bar.О́zimiz kúnde kórip júrgen salaqtyq pen nemquraıdylyq ta tabıǵatty barynsha búldiredi. Serýenge shyqqanda nemese kókke shyǵyp, demalyp otyrǵan jerge qaldyra salatyn ár túrli qaldyqtarǵa kóz súrinetin boldy. Sóıtip, tabıǵatty búldiretin ózimiz. Sondyqtan, tek mektepte ǵana emes, árbir otbasyda ekotárbıe bolý kerek. Adam balasy tabıǵat-Anasyz ómir súre almaıdy. Eldi meken mańyndaǵy aǵashtardyń kesilýi, bulaq kózderi men ózenderdiń lastanýy, keıbir ańdar men qustardyń joıylýy, bul - ekologııalyq másele. Búkil adamzat balasy bolyp qorshaǵan ortanyń ekologııalyq tazalyǵyna bir mezgil kóńil bólse, ózimizdiń Jer – Anamyzdyń aldyndaǵy úlken paryzdyń oryndalǵany bolar edi",-dedi. Jıyn sońynda, A.Balaeva búgingi kóterilgen ortaq máselelerdi sheshýge vedomstvolar men qoǵamdyq uıymdardyń atsalysýyn úılestirýge Aqparat jáne qoǵamdyq damý mınıstrliginiń ázir ekenin málimdedi.