Taıaýda ǵana Almatyda jalǵan dári-dármekter daıarlaıtyn astyrtyn seh pen olardy salýǵa arnalǵan qoraptar shyǵaratyn baspahana jáne zańsyz ónimderdi saqtaıtyn qoıma tabyldy. Tekseris kezinde kúmándi jolmen jasalyp, satýǵa ázirlengen, jalpy kólemi 100 tonnadan asatyn dárilik zattar tárkilendi. Osyǵan oraı Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed dabyl qaǵyp, elimizdiń Bas prokýroryna hat joldady.
Senat depýtaty atalǵan zań buzýshylyqtyń zardaby aýyr ekenine jáne qulqynnyń quly bolǵan mundaı kásipkerlerdiń is-áreketine der kezinde tosqaýyl qoıý kerektigine nazar aýdarǵan.
«Qazir árbir dárilik preparat pen medısınalyq buıym esepke alynyp, dárigerlerimiz árbir syrqattyń densaýlyǵy men ómirin saqtap qalý úshin janqııarlyqpen kúresip jatqan kezde mundaı sumpaıy kásipkerlerdiń ashkózdigi men aramzalyǵy jaǵany ustatady. Olardyń aram pıǵylynyń aýqymy bizdiń myńdaǵan otandasymyzdyń ómirine qaýip tóndirip, elimizdiń densaýlyq saqtaý júıesine orasan zor nuqsan keltire jazdady», delingen hatta.
Sonymen qatar senator bul bassyzdyq tek otandyq medısınaǵa emes, tutas ultqa tóngen qater ekenin de tilge tıek etken. Shyn máninde, «Qazaqstan Respýblıkasynyń Ulttyq qaýipsizdik týraly» zańyna sáıkes azamattardyń ómiri, densaýlyǵy jáne amandyǵynyń jaı-kúıi ulttyq qaýipsizdiktiń bir túri bolyp tabylady. Sondyqtan hatta qylmystyq izdestirý organdary falsıfıkat ónimderdi taratýdan týyndaıtyn aýyr saldarlardy dáleldeý kerektigine de basa mán berilgen.
«Qazirdiń ózinde halqymyz óte qıyn jaǵdaıdy bastan keshirip otyrǵan jaǵdaıda mundaı soraqy qylmystyń oryn alýy el qaýipsizdigine tóngen zor qater dep baǵalanýǵa tıis. Osyǵan oraı dárilik zattar men medısınalyq buıymdardy satý, taratý jáne saqtaýmen aınalysatyn mekemelerdi shuǵyl túrde tekserý kerek. Mundaı astyrtyn sehtyń qansha ýaqyt jumys istep, falsıfıkat ónimderdiń qansha mólsherin taratyp úlgerý múmkindigi de arnaıy tekserýdi qajet etedi», deıdi Muhtar Qul-Muhammed.
Budan basqa, hatta osy saladaǵy halyqaralyq tájirıbe de súzgiden ótkizilip, mundaı qylmystyń aýqymy, adam ómiri men densaýlyǵyna tıgizetin aýyr zardaptary qylmystyq jaýapkershilik turǵysynan saralanýǵa tıis ekeni aıtylǵan. Sondaı-aq jalǵan dárilik quraldar men medısınalyq buıymdardy daıarlaý, olardyń ataýy men qoraptaryn zańsyz jolmen paıdalaný da derbes qylmystyq quram retinde qarastyrylýy qajettigi jazylǵan.
Osyǵan baılanysty Senat depýtaty dárilik quraldar men medısınalyq buıymdardy paıdalaný salasyndaǵy qylmystyq zańnamany odan ári jetildirý máselesin jedel qolǵa alý kerektigin alǵa tartyp, bul iste Joǵarǵy palatanyń Halyqaralyq qatynastar, qorǵanys jáne qaýipsizdik komıteti qoldaý men kómek kórsetýge ázir ekenin jetkizgen.
Senatordyń málimdemesi jarııa etilgen kúni tústen keıin aldamshy dári-dármek jasaýshylar men ony uıymdastyrýshylardyń qamaýǵa alynǵany habarlandy. Biraq kúdiktilerdiń aty-jóni kórsetilmeýine qaraǵanda, olardyń artynda dúmi myqty bireýler turǵandaı kórinedi.