QR Premer-Mınıstri Asqar Mamınniń tóraǵalyǵymen ótken Úkimet otyrysynda QR sıfrlyq damý, ınnovasııalar jáne aeroǵarysh ónerkásibi birinshi vıse-mınıstri Baǵdat Mýsın halyqty joǵary jyldamdyqty ınternetpen qamtamasyz etý boıynsha atqarylyp jatqan jumystar týraly baıandady.
«Nur Otan» partııasynyń saılaýaldy baǵdarlamasy aıasynda jyl sońyna deıin 250-den astam turǵyny bar eldi mekenderdi joǵary jyldamdyqty ınternetpen qamtamasyz etý tapsyryldy. B. Mýsın atap ótkendeı, búgingi tańda 118 qala men 4 273 aýyl 3G jáne 4G tehnologııasyn qoldana otyryp, joǵary jyldamdyqty ınternetpen jabdyqtalǵan. Qalalar men iri eldi mekenderde «optıkalyq» baılanys qoldanylady. Jyl sońyna deıin 928 aýyldy ınternetpen qamtamasyz etý josparlanýda. Onyń 97-si — qyrkúıekke deıin.
"Búginde 4 422 mektep 8 Mbıt joǵary jyldamdyqty ınternetpen qamtamasyz etilgen. Taǵy 1 086 mekteptiń ınternetti osy deńgeıge kóterýge tehnıkalyq múmkindigi bar. Ol úshin ákimdikter tıisti qarajatty qarastyrýy qajet", — dedi B. Mýsın.
Sondaı-aq qamtý aımaǵyn keńeıtý jáne ınternetke qosylý jyldamdyǵyn arttyrý máselesin sheshý úshin osy jyldyń naýryz aıynan bastap 306 bazalyq stansııa salyndy jáne onyń 1 802-si jańǵyrtyldy. 105 myńnan astam jańa úı symdy ınternetke qosylǵan.
Sonymen qatar B. Mýsın ınternet sapasyn jaqsartýdyń qosymsha sharalary týraly baıandady. Máselen, Nur-Sultan, Almaty jáne Shymkent qalalarynda radıojıilik spektri taldandy, onyń negizinde qosymsha antenna-dińgek qurylystaryn ornatý qajet bolatyn naqty oryndar anyqtaldy.
"Biz sizden ákimdikterge jer telimderin bólýge jáne onda elektr energııasyn ótkizýge kómek kórsetýdi tapsyrýyńyzdy suraımyz. Sodan keıin biz ákimdiktermen birlesip, antenna-dińgek qurylystaryn turǵyzatyn jeke ınvestordy tabýǵa daıynbyz, sonyń nátıjesinde sıgnaldary álsiz aımaqtar máselesin osylaı sheshemiz", — dedi B. Mýsın.
Onyń aıtýynsha, mundaı jumysty barlyq jerde júrgizý qajet. Budan ózge B. Mýsın jyljymaly ólsheý keshenderimen, avtomobıldermen jáne tasymaldanatyn ólsheý aspaptarymen jabdyqtaý úshin qosymsha qarajat bólý qajet ekenin atap ótti.
Sonymen qatar endi bilim berý platformalary jergilikti jerlerde Qazaqtelekomnyń derekterdi óńdeý ortalyqtarynda ornalasatyny atalyp ótti. Buǵan deıin bári ortalyqtandyrylǵan bolatyn jáne bul bir jerde ınternet-trafıktiń jınalýynyń belgili bir qıyndyqtaryn týdyrdy. Bul sheshim óńirler boıynsha bilim berý resýrstaryn jergiliktendirýge múmkindik beredi. Tıisinshe, bul ınternetke júktemeni azaıtady. Budan ózge bul sheshim beıne konferensııa baılanysy fýnksııasyn paıdalaný múmkindigine yqpal etetin bolady.