Qala ákiminiń orynbasary Baqtııar Makenniń tóraǵalyǵymen, bilim basqarmasynyń basshysy Sholpan Qadyrova men bilim berý uıymdary basshylarynyń qatysýymen jańa oqý jylyna daıyndyq máseleleri boıynsha jınalys ótti, dep habarlaıdy elorda ákimdiginiń resmı saıty.
Qazaqstanda aldaǵy oqý jyly (shalǵaıdaǵy aýyl mektepterin qospaǵanda) barlyq mektepterde 1-11 synyptar qashyqtan oqytylady dep josparlanýda. Osyǵan oraı, B.Maken otyrysta bilim basqarmasyna bilim berý uıymdarynyń qashyqtan oqytýǵa jáne kezekshi synyptardyń jumysyna daıyndyǵyn qamtamasyz etý, mektepterdegi kúrdeli jáne jyl saıynǵy jóndeý jumystaryn aıaqtaý, tıisti aktini toltyryp, bilim berý uıymdarynyń oqý jylynyń basynda daıyndalatyn komıssııalyq qabyldaýdy qamtamasyz etýdi tapsyrdy.
Mektep dırektorlaryna balalardy birinshi synypqa memlekettik qyzmetterdi kórsetý merzimderin buzbaı qabyldaýdy jalǵastyrý, kolledjder úlgisin qoldana otyryp, bilim berý uıymdarynyń veb-saıtynda dırektormen vırtýaldy qabyldaý uıymdastyrý (jaýapty qyzmetkerdi taǵaıyndaý, suraqtardyń kelip túsýin kúndelikti baqylaý), 30 tamyzǵa deıin kelisimshartqa sáıkes nysandardy kúrdeli jáne jyl saıynǵy jóndeýdi aıaqtaý tapsyryldy.
Sonymen birge, bilim berý uıymdary 20 tamyzǵa deıin jylý júıesin testileý boıynsha jumystardy aıaqtaý, daıyndyq aktilerin alý, kezekshi synyptar, olardaǵy stýdentter men oqytýshylar sanyn anyqtaý úshin monıtorıng júrgizý, jalpy bilim berýde kómek alýǵa ótinishterdiń qabyldanýyn baqylaý, barlyq sanıtarlyq sharalardy saqtaı otyryp, "Qamqor Vseobých" málimetter bazasyn 1-11 synyp oqýshylaryna arnalǵan oqýlyqtarmen ýaqtyly toltyrýdy qamtamasyz etýi qajet. Sonymen qatar mektep dırektorlaryna áleýmettik sanattaǵy balalardyń tizimin daıyndaý tapsyryldy: jetim balalar, az qamtylǵan otbasylardan shyqqan, erekshe bilim berý qajettiligi bar balalar.
Ár balaǵa ınterneti bar kompıýterlik tehnıkany bekitip berý tapsyryldy. Sondaı-aq, mektep ujymymen sanıtarlyq talaptar men qaýipsizdik erejelerin saqtaý boıynsha nusqaýlyq ótkizý, dezınfeksııalyq quraldaryn, sanıtarlyq qaýipsizdik quraldaryn (maskalar, qolǵaptar, tonnelder, sanıtaızerler, teplovızorlar, aıaq kıimge arnalǵan kilemsheler) jetkilikti mólsherde qamtamasyz etý, jańa oqý jylynyń basynda barlyq uıymdardy, onyń ishinde jańa mektepterdi pedagogıkalyq kadrlarmen tolyqtyrý, sondaı-aq 15 tamyzǵa deıin mektep aýmaǵyn abattandyrý boıynsha jumystardy aıaqtaý qajet.