Qazaqstan Respýblıkasynyń Ulttyq Banki "Este qalatyn oqıǵalar men birtýar adamdar" serııasynan "ABAI. 175 JYL" kolleksııalyq monetalaryn aınalysqa shyǵarady. Monetalar shyǵarylymy aqyn jáne aǵartýshy Abaı Qunanbaevtyń týǵanyna 175 jyl tolýyna oraılastyrylǵan, - dep habarlaıdy Egemen.kz
Qazaqstan Respýblıkasynda karantın rejıminiń uzartylýyna baılanysty monetalardy satý merzimi keıinirek habarlanady. Satý kúni týraly aqparat Qazaqstan Respýblıkasy Ulttyq Bankiniń resmı saıtynda qosymsha ornalastyrylatyn bolady.
"ABAI. 175 JYL" monetalarynyń sıpattamasy:
Monetalardyń bet jaǵynda (aversinde) ortalyq bóliginde Qazaqstan Respýblıkasynyń Memlekettik Eltańbasy beınelengen. Eltańbanyń sol jáne oń jaǵynda "QAZAQSTAN RESPÝBLIKASY ∙ REPUBLIC OF KAZAKHSTAN" degen jazbalar ornalasqan. Aınaldyra ulttyq oıý-órnek elementteri bar. Tómengi bóliginde "TEŃGE" jazbasy jáne kúmis monetada monetanyń nomınalyn bildiretin "500" sany jáne melhıor men neızılber monetalarynda "100" sany beınelengen.
Monetalardyń syrt jaǵynda (reversinde) Abaı Qunanbaevtyń músindik portret beınesi, kúmis jáne melhıor monetalarda ınterferensııalyq túrli-tústi beıneleý tehnologııasyn qoldana otyryp oryndalǵan sııa qutysynyń jáne qalamushtyń stıldendirilgen beınesi ornalasqan. Portrettiń oń jaǵynda – qazaqtyń kıiz úıi (basqur) dekory túrindegi oıý-órnek taspasy, onyń astynda Abaı Qunanbaevtyń týǵan jylyn, 175 jyldyǵyn merekeleıtin kúndi jáne soǵylǵan jylyn bildiretin "1845-2020" degen jazba ornalastyrylǵan. Oń jaǵynda - metaldyń massasyn bildiretin "31,1 g" degen jazba bar. Monetanyń joǵarǵy bóliginde "175" jáne "JYL" degen jazba bar. Sol jaq bóliginde ulttyq oıý-órnek elementi, kúmis monetada moneta daıyndalǵan metaldy jáne onyń synamyn bildiretin "Ag 925" degen jazba bar. Monetanyń tómengi bóliginde latyn grafıkasynda "ABAI" degen jazba bar.
Tehnıkalyq ólshemderi:
"Rroof" sapaly monetalar 925/1000 synamdy kúmisten, massasy 31,1 gramm, dıametri 38,61 mm, nomınaly 500 teńgelik, taralymy 1 500 danada daıyndaldy.