Trolleıbýstardan bas tartý kún tártibine qoıylǵan joq jáne qoıylmaıdy da. Bul týraly qala ákimi Baqytjan Saǵyntaev "Almaty" telearnasyndaǵy Akimat Live baǵdarlamasynyń tikeleı efırinde aıtty, dep jazady Egemen.kz
Qalalyqtardyń suraqtaryna jaýap bergen B.Saǵyntaev trolleıbýstardyń jumysyn qamtamasyz etetin baılanys jelileri men qosalqy stansalardy modernızasııalaý baǵdarlamasynyń ótken jyly qabyldanǵanyn habarlady.
Bıylǵy pandemııa saldarynan shyǵyndar qysqartyldy. Jyl sońyna deıin 16 kóshedegi baılanys jelileri jańaratyn bolady.
"172 shaqyrym jelilerdi aýystyrýdy qajet etetin trolleıbýs ınfraqurylymyn tolyqtaı modernızasııalaýdy 2021 jyly aıaqtaýdy josparlaýdamyz", dedi Almaty ákimi.
2020 jyldyń sońyna deıin Jandosov, Seıfýllın, Qabanbaı batyr, Áýezov, Rozybakıev, Jubanov, Emsov, Qaldaıaqov, Pýshkın kósheleri men Rysqulov jáne Raıymbek dańǵyldarynyń boıyndaǵy eskirgen baılanys jelileri alynyp tastalady jáne qaıta montajdalady.
Buryn kabeldi jáne baılanys jelilerine kúrdeli jóndeý jumystary sonaý 2000 jyly ǵana júrgizilgen eken. Kún saıyn segiz baǵyt boıynsha jolaýshy tasymaldaýǵa 160 trolleıbýs shyǵatyn bolady. Mundaǵy jolaýshy aǵyny aı saıyn shamamen 2,5-3 mln adamdy quraıdy. Trolleıbýs jelisiniń jalpy uzyndyǵy 191 shaqyrym.