Búgin, 23 qazan kúni Almatyda ótip jatqan bokstan XVII álem chempıonatynda 1/4 fınaldyq shaıqastar bolyp ótip, jahandyq jarystyń júldeleri júıegine enetin enshilester esimderin anyqtady. Bul talasqa dúnıe júziniń 30 elinen 80 boksshy qatysty. Sol dúrmekte Qazaqstannyń 9 tarlany jarysqa jalyn qosyp, 8-i jartylaı fınalǵa shyqty.
Bizdiń qurama úshin kúndizgi sessııa sáttirek aıaqtaldy. Munda 9 boksshynyń 4-i óner kórsetip, bári de úlken abyroı bıiginen kórindi. Osy kvartettiń jeńisti jolynyń áýelgi arnasyn 49 kıloǵa deıingi salmaqtaǵy Birjan Jaqypov tartty. Ol Pýerto-Rıkonyń jalǵyz úmiti – Entonı Chakon Rıverany óte senimdi utyp shyǵyp, Qazaqstan qorjynyna alǵashqy medaldiń túskenin pash etti. Biz Birjandy bul joly úlken jiger ústinde kórdik. Onyń qazir naǵyz sporttyq babynda ekeni aıqas bastalǵan shaqta-aq baıqaldy. Urys barysynda sonymen birge ony júrgizýdiń ǵalamat tehnıkasyn kórsetken boksshymyz qarsylasyna úsh raýnd boıy des bermedi. Bul joly sharshy alańda birinshi nómirmen oınaǵan ol shaıqastyń sońyn da óte áserli aıaqtady. Al kelesi jekpe-jekte kýbalyq Iosvanı Soto Veıtıa ıtalıan Manýel Kappaıdi ıtjyǵys tires ústinde áreń jeńdi. Endi ol jartylaı fınalda Birjanmen qolǵap túıistiredi. Bul eki boksshy buǵan deıin bir ret bir-birimen judyryq siltesip úlgergen. Ol 2011 jylǵy 26 qyrkúıek kúni Bakýdegi álem chempıonatynyń 1/32 fınaly kezinde oryn alǵan. Shaıqas qorytyndysy 21:11 esebimen Bostandyq araly jas perisiniń paıdasyna sheshilgen. Mine, Birjanǵa sonyń qarymtasyn qaıtarýdyń ádemi ońtaıy kelgeli tur.
Solaı etýge ábden bolatynyn bizden osydan keıin rıngte taǵy bir kýbalyqpen ustasqan 56 kıloǵa deıingi salmaqtaǵy Qaırat Erálıev keremet etip kórsetti. Ol osy chempıonattaǵy eń ataǵy zor, 2012 jylǵy London Olımpııalyq oıyndarynyń jalǵyz chempıony Robeısı Ramıresti talassyz jeńdi. Teginde, bul joly jeńimpaz urystyń taktıkasyn durys qalyptastyra almaı qalǵan sııaqty. Kezdesý bastalǵan sátten ekinshi nómirge óz erkimen kóshken onyń báseńdigi Qaırattyń óz-ózine kelip, senimi arta túsýine kóp kómektesti. Ekinshi raýndta ol tipti erkin ketti. Sonyń nátıjesinde ataqty qarsylasyn teńseltip jiberetindeı birneshe aýyr soqqylar jasady. Solardyń birinde referıdiń esep ashatyndaı da reti bar edi. Al úshinshi raýndta óziniń utylyp bara jatqanyn sezgen kýbalyq qabylan yshqyna alǵa umtylǵan. Alaıda, Qaırat baǵyttyń bulaı ózgerýine daıyn bolyp shyqty. Ol jaqsy qorǵana júrip, reti kelgen jerinde soqqylar berýden de tanbady. Munyń qorytyndysy sol, tóreshilerdiń úsheýi de jeńis qazaq boksshysy qanjyǵasynda ketkenin aıǵaqtap berdi. Jartylaı fınalda ol úndi Shıva Tapany utqan ázerbaıjan Djavıd Chelebıevpen ushyrasady.
Shyny kerek, biz budan keıin urys alańyna qyrǵyz Ermek Sakenovpen birge kóterilgen 64 kılodaǵy Mereı Aqshalovtyń aldyńǵy tolqynnyń aryndy aǵynyn jarasymdy jalǵastyra alatynyna shúbá keltirgen joq edik. Buǵan sebep, bıylǵy shilde aıynda Iordanııada ótken Azııa birinshiliginde chempıon atanǵan qazaq boksshysy jartylaı fınalda osy qarsylasyn aıqyn basymdylyqpen utqan. Sonyń da áseri bolǵan shyǵar, bizdiń baǵlan urysqa kóterińki kóńil kúımen kiristi. Udaıy qımyl ústinde júrgen Mereıdiń sheberligi jaǵynan da, deńgeıi jaǵynan da qarsylasynan edáýir joǵary ekeni aıqyn baıqalyp turdy. Jattyqtyrýshylarynyń nusqaýyn osylaısha tııanaqty oryndap shyqqan ol kelesi joly lıtvan Evýaldas Petraýskasty kúrdeli jaǵdaıda 2:1 etip utqan brazılııalyq Everton Lopespen fınalǵa shyǵý jolynda shaıqasady. Biraq qarsylasynyń ataǵy úlken. 2011 jylǵy álem chempıony. London Olımpıadasynda 1/8 fınalda kýbalyq bolashaq chempıon Rosnıel Iglesıastan utylyp qalǵan.
Kúndizgi sessııadaǵy tórttiktiń núktesin quramadaǵy eń jas boksshy Jánibek Álimhanuly qoıdy. Ol 2011 jylǵy álem chempıonatynyń qola júldegeri, Eýropanyń bıylǵy jylǵy fınalısi rýmyn Bogdan Jýratonıdi 3:0 etip tize búktirdi. Osy tórt shaıqastyń ishindegi eń kúrdelisi de osy boldy. Buǵan osy kezge deıingi eki urysyn da keremet jarqylmen ótkizip, kóptiń kótere maqtaýyna iligip qalǵan jas berenniń eptep toqmeıilsý kádesine elige túsken de bir sebep bolǵan sııaqty. Ne degende de, aıqastyń bas jaǵy ol úshin aýyrlaý ótti. Qoladan quıylǵan qalyptaı bir yrǵaqpen aýyr qozǵalyp, aýyr soqqy jasaıtyn bessarabııalyq baǵlannyń qımyly ony biraz tyǵyryqqa tiredi. Ekinshi raýndta tipti rýmynnyń qarqynyna ilesýi qıyndap bara jatqan jigitimizdiń túbinde jeńiske jetýi qıyn bolatynyn da paıymdaı bastaǵanbyz. Qýanyshtysy, sońǵy sheshýshi kezeńde Jánibek bar kúsh-jigerin boıyna jıyp, aqyrǵy shabýyldarǵa aqyra kiristi. Túptiń túbinde tarazynyń basyn sol joryqtar josyǵy oǵan aýdaryp tastady. Osy sátte jartylaı fınaldaǵy básekeles te belgili bola qaldy. Bul oryndy nemis Shtefan Haerteldi utqan aǵylshyn Entonı Foýler basty.
Araǵa bir saǵat úzilis salyp ótken keshki sessııada da bizdiń 4 boksshy alań tórinde atoılady. Al besinshi sańlaǵymyz – asa aýyr salmaqtaǵy Ivan Dychkomen qolǵap túıistirer úndi Satısh Kýmar shaıqasqa shyqpaı qaldy. Shamasy, osydan eki aı ǵana buryn Ammanda bizdiń batyrdan ońbaı utylǵany ony toqtatsa kerek. Sóıtip, Vanıa jartylaı fınalǵa uryssyz bettedi. О́kinishtisi, bul kezeńdegi urystardyń basyn bastaǵan 52 kılodaǵy Ilııas Súleımenovtiń ýelstik Endrıý Selbımen kezdesýi bizge búgingi kúnniń birinshi jáne sońǵy jeńilisin ákeldi. Bizdiń balany London Olımpıadasynyń 1/8 fınalynda joldan qaqqan Eýropanyń 2013 jylǵy chempıony, 2011 jylǵy álem chempıonatynyń kúmis júldegeri bul joly taǵy da onyń aldyna tosqaýyl bolyp shyǵa keldi. Biraq biz tap Almatynyń aıasynda vallı balasyna esesin jibergen Ilııasty kórgen joqpyz. Bizdiń baǵlandy joldan jańyldyrǵan tek onyń óziniń alda turǵanyna senimi basym túsip, úshinshi raýndtyń sońyn «kútip alý» taktıkasymen ótkizgeni bolýy ǵana múmkin.
Esesine, budan keıingi sańlaqtarymyz shashalaryna shań juqtyrmady. Degenmen, buǵan qarap, barlyq shaıqas tabaǵa quıylǵan maıdaı erip, bizdiń paıdamyzǵa ózinen-ózi sheshile bergen eken, degen de uǵym týmaýy kerek. Jigitterimizdiń qaı-qaısysy da ózderine tıesili jeńisti keskilesken tartystyń terbeýinde tartyp áketti. Sonyń aıqyn bir úlgisin 60 kılodaǵy Berik Ábdirahmanov kórsetip, páseıip bara jatqan kóńil aýanyn qaıta kóterip tastady. Jasyratyny joq, onyń venesýelalyq qarsylasy Lýıs Dıas qolynyń da, boıynyń da uzyndyǵymen biraz qıyndyq keltirip, urystyń birden jankúıer qalaǵan arnada aǵyndap júrýine yryq bermedi. Bir qýanyshtysy, Berik ekinshi raýndtan bastap buǵan basqa amal-aıla tapty. Ol qarsylasyn udaıy buryshtan-buryshqa qýa júrip, jaqyn qashyqtyqtan soqqylaýǵa kóshti. Sóıtip, óziniń 3:0 etip jeńgenine tóreshilerdiń de kózderin jetkizdi. Endigi shaıqas London Olımpıadasynyń qola júldegeri, 2011 jylǵy álem chempıony kýbalyq Lazaro Alvarespen ótedi.
Kelesi kezekte qazaqstandyq kórermenderdi qýantqan komanda kapıtany, 69 kılo salmaqtaǵy Danııar Eleýsinovtiń de qarsylasy ońaı jaǵylatyn jańǵaq bolǵan joq. 2012 jylǵy London Olımpıadasy men 2011 jylǵy álem chempıonatynyń qola júldegeri kim-kimniń de taqııasyna tar kelmeıdi. Munyń ústine onyń Albıon jerindegi alamanda bizdiń kapıtandy jeńip ketkeni taǵy bar. Sol tarlan – ıtalıan Vınchenso Mangıkapre bul joly da aıbynyn asyrmaqshy boldy. Biraq arynyn bizdiń boksshy tez basyp otyrdy. Qashyqtyqty udaıy durys ustaı bilgen Danııar tym artyq qımylǵa barmaı-aq ózine kerekti upaılardy jınaı berdi. Sońynda onyń jeńgenine eshkimniń kúmáni bolǵan joq. Endi ony osy joly Londonnyń fınalynda bizdiń Serik Sápıevke jol bergen aǵylshyn Fred Evanstan aılasyn asyrǵan germanııalyq armıan Araık Marýtıan kútip tur. Dál osyndaı tálimdi taktıkany 81 kılodaǵy Ádilbek Nııazymbetov te ustandy. Onyń úndi Sýmıt Sangvanmen urysy asa bir qatty qarqynda ótpegenimen, bizdiń boksshynyń basymdyǵyn bútin baıqatqan baıypty barlasýlardyń biri boldy. Osy jeńisi ony erteń Ammanda ótken bıylǵy Azııa birinshiliginiń fınalynda alyn orap ketken ózbek Oıbek Mamazýlýnovpen qaıta ushyrastyrady. Tashkenttiń tuıǵyny gollandııalyq Peter Mýllenbergti aıqyn basymdyqpen utqannan keıin aldaǵy aınalymǵan aıaq basty.
Sonymen, erteń boksshylar demalady. Al arǵy kúni jartylaı fınaldyq aıqastar ótedi. Oǵan bizdiń 8 boksshydan basqa, Kýbanyń – 5, Reseıdiń – 4, Italııa ıen Ázerbaıjannyń úsh-úshten ókilderi qatysady.
{youtube}IorXRJbw7BA{/youtube}
{youtube}2rWdxHwMfPc{/youtube}