Koronavırýstyń taralýyna jol bermeý jónindegi vedomstvoaralyq komıssııa Qazaqstanda qandaı aýrý túrleri azaıǵanyn málimdedi, - dep habarlaıdy Egemen.kz.
Sanıtarlyq qyzmetter 97 juqpaly aýrýǵa monıtorıng júrgizgen. Nátıjesinde jarty jyldyń qorytyndysy boıynsha 61 ınfeksııadan syrqattanýshylyq azaıǵany belgili boldy.
"Atap aıtqanda, serozdy menıngıtpen (14,6 esege), irińdi menıngıtpen (4,8 esege), salmonellez (2,5 esege), rotavırýstyq enterıtpen (38,2 paıyzǵa), brýsellezben (46,1 paıyzǵa), kókjótelmen (26 paıyzǵa), menıngokokk ınfeksııasymen (26,8 paıyzǵa), qyzylshamen (3,2 esege), týberkýlezben (27,3 paıyzǵa) syrqattanǵandar sany tómendegeni baıqaldy", - delingen habarlamada.
Belgili bolǵandaı, 2020 jyldyń basynan beri elimizde oba, tyrysqaq, ish súzegi, qutyrma, týlıaremııa, dıfterııa, sirespe, qyzamyq aýrýlary tirkelmegen.
Sanıtarııalyq-epıdemıologııalyq qyzmet oba, KVGL jáne basqa da tabıǵı-oshaqtyq ınfeksııalardyń aldyn alý maqsatynda aldyn alý is-sharalaryn júrgizip keledi.