Máslıhat minberinde oblystyń sońǵy 7 aı ishindegi damý qarqyny jóninde baıandaǵan Arhımed Muhambetov indetke baılanysty jarııalanǵan shekteý sharalarynyń kedergi keltirgenine qaramastan, aımaq ekonomıkasynda ilgerileý bar ekenin atap ótti.
Máselen, atalmysh kezeń ishinde oblysta ónerkásip óndirisiniń naqty kólem ındeksi - 106,5%; aýyl sharýashylyǵy – 102,0%; negizgi kapıtalǵa salynǵan ınvestısııa - 113,8%; qurylys jumystary –114,3%; turǵyn úılerdi paıdalanymǵa engizý - 108,4% kórsetkishke ıe bolǵan.
О́nerkásip óndirisiniń ósimi - 6,5%-ǵa artyp, 777,5 mlrd teńgeniń ónimi óndirilgen. О́ńdeý kásiporyndarynyń ónimi 18,9%-ǵa artyp otyr.
Sonymen qatar, aımaq basshysy depýtattarǵa oblysta josparlanǵan ınvestısııalyq jobalar, shaǵyn jáne orta bıznesti qoldaý sharalary, memlekettik baǵdarlamalardyń júzege asyrylý barysy, TKSh júıesin, jumyspen qamtýdy, densaýlyq jáne bilim berý salalaryn damytý baǵytynda atqarylyp jatqan jumystar jóninde baıan etti.