Indetpen kúres jaǵdaıyndaǵy karantın kezeńinde qyzmet túrlerin sıfrlandyrýǵa degen qajettiliktiń kúrt óskeni baıqalady. Soǵan sáıkes jyl sońyna deıin Almaty oblysynda memlekettik qyzmetterdi avtomattandyrý deńgeıin 90 % jetkizý kózdelip otyr. Bul birinshiden, turǵyndardyń memlekettik qyzmet alýdaǵy ýaqytyn únemdeýge áser etse, ekinshiden qyzmet kórsetýdiń ashyqtyǵyna, qoljetimdiligine jáne jemqorlyq faktileriniń aldyn alýǵa yqpal etetin faktor. Bul týraly búgin Almaty oblystyq sybaılas jemqorlyqtyń aldyn alý máseleleri jónindegi vedomstvoaralyq komıssııanyń otyrysynda aıtyldy, - dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Búginde Almaty oblysynyń ákimdigi tarapynan 170 memlekettik qyzmet kórsetilse, sonyń 141-i, ıaǵnı 82,9 %-i avtomattandyrylǵan. О́ńirlik geoaqparattyq júıe aıasynda Almaty oblysynda jer qatynastary men sáýlet salalaryndaǵy 21 memlekettik qyzmetti avtomattandyrý jumystary aıaqtalýǵa jaqyn. Sol sııaqty bilim men sport salalaryndaǵy taǵy 12 qyzmet túri de avtomattandyrylýda. Turǵyn úı-kommýnaldyq salaǵa, qoǵamdyq kólik qatynasyna sıfrlyq jańalyqtar engizý maqsatynda birqatar jobalar qolǵa alynýda. Oblystyq sıfrlandyrý basqarmasynyń basshysy Talǵat Omarov Almaty oblysynyń ákimi Amandyq Batalovtyń tóraǵalyǵymen ótken komıssııa otyrysynda osyndaı málimetter keltirdi. Jıyn barysynda Sybaılas jemqorlyqqa qarsy is-qımyl agenttiginiń Almaty oblysy boıynsha departament basshysy E.Maqajanov departament tarapynan jasalǵan taldaý jumystarynyń qorytyndysy boıynsha birqatar máseleler kóterdi. Máselen, jyl basynan beri Almaty oblysy boıynsha Sybaılas jemqorlyqqa qarsy qyzmet 137 quqyq buzýshylyqty anyqtaǵan, sonyń 75,2 %-i nemese 103 zańbuzýshylyq - sybaılas jemqorlyq sıpatyndaǵy qylmystar. Osy merzim ishinde sybaılas jemqorlyq áreketterine barǵany úshin 87 adam qylmystyq jaýapqa tartylǵan. Olardyń qatarynda jergilikti atqarýshy organ qyzmetkerleriniń úlesi birshama. Ásirese, jer qatynastary salasynda jer komıssııasy jumystaryna erekshe qyraǵylyqpen qarap, qajet bolsa komıssııa quramyn túbegeıli jańadan qalyptastyrý qajettigi de usynyldy. Bul oraıda E. Maqajanov jemqorlyq qylmystyń aldyn alý sharalaryna kóbirek kóńil bólip, ár mekeme óziniń ishki baqylaýyn kúsheıtýi tıis ekenin atap kórsetti.
Jıyn barysynda oblystyq jer qatynastary basqarmasynyń basshysy Sábıt Sádýaqasov ta óz tarapynan jemqorlyqqa qarsy is-qımyl sharalary týraly tolyqtyryp ótti. Onyń aıtýynsha, 2015 jyly jerdiń 7 sanaty engizilgen jáne jer ýchaskeleriniń pasporttaryn qaraý múmkindigi bar elektrondyq karta jasaldy. Qazirgi ýaqytta jer kartasynyń qabattary men obektileriniń quramy keńeıtildi. 2017 jyly elektrondyq kartany memlekettik tizilimmen jáne oblys basqarmalarynyń derekter bazasymen ıntegrasııalaý júrgizildi.
Sol sııaqty 2019 jyly kórsetiletin memqyzmetterdi sıfrlandyrýǵa oblystyq bıýdjetten 508,0 mln. teńge bólinip, ıgerilgen. Almaty aglomerasııasyn qamtı otyryp, aqparattyq qaýipsizdikti qamtamasyz etý, memlekettik jer kadastrynyń avtomattandyrylǵan aqparattyq júıesiniń geoportalyn, «Jyljymaıtyn múlik tirkelimi» memlekettik derekter qorynyń aqparattyq júıesin, halyqqa qyzmet kórsetý ortalyqtarynyń aqparattyq júıesin ıntegrasııalaý jumystary júrgizilýde. Bul maqsatqa 272,6 mln. teńge somasyna bıýdjettik ótinim berilip, jumystar Almaty qalasyna jaqyn ornalasqan 5 aýdan ortalyǵynda júrgiziledi dep josparlanǵan.
Jıyn sońynda oblys ákimi Amandyq Batalov oqylǵan baıandamalar men aıtylǵan usynystardy qoryta kele:
- Búgingi kóterilip otyrǵan máselelerdiń bári de ózekti. Biz Sybaılas jemqorlyqqa qarsy qyzmet departamentimen birlesip, jemqorlyq áreketterdiń aldyn alý, túsindirý jumystaryn úzdiksiz, qajet bolsa departamentten jan-jaqty ádistemelik kómek ala otyryp atqarýymyz kerek. Ár mekeme-uıym óziniń ishki baqylaýyn kúsheıtýi kerek. Aýdan, qala ákimderine jer máselesinde zańsyzdyqtarǵa jol bermeý týraly qatań eskertemin. Orynbasarym Serik Turdalıevke aýdan, qalalardaǵy jer komıssııalary jumysyn egjeı-tegjeıli zerdeleýdi tapsyramyn. Kemshilikterge, zań buzýshylyqqa jol bergenderdiń komıssııa quramynda qalýyna jol berilmeıdi. Túgeldeı qaıta jasaqtap, jańartý kerek. Rasynda, koronavırýsqa baılanysty shekteý kezeńi bizge sıfrlandyrý isimen túbegeıli aınalysý qajettigin aıqyn kórsetti. Qyzmet túrlerin avtomattandyrýdy odan ári údetýimiz kerek, - dedi A. Batalov.