Semeıdegi veterınarlyq mekemelerge qala mańyndaǵy 12 aýyldyq okrýgke qyzmet kórsetý úshin «Nıva» markaly jańa avtokólikter tabystaldy. Qalanyń ortalyq alańynda ótken saltanatty rásimge qatysqan «Semeı qalalyq veterınarııa jáne fıtosanıtarııa qyzmeti» KMK dırektory Amangeldi Musambaevtyń aıtýynsha, 2012 jyldan bastap veterınarlyq qyzmet salasyn Qazaqstan joǵary dárejege kóterip, damytý ústinde. Soǵan oraı respýblıkalyq bıýdjetten qarjy bólinip, 12 avtomobıl satyp alynǵan. Kólikterdiń ishi arnaıy jaraqtandyrylǵan. Mal dárigerleri úshin termojáshikter bar. Onda bakterııalyq materıaldar men arnaıy hırýrgııalyq quraldar saqtalady. Bir kóliktiń quny 1 mln. 786 myń teńge turady. Bireýi Kýrchatov qalasyna arnalsa, qalǵandary Abyraly, Alǵabas, Qaraóleń, Znamenka, Novo-Bajenovo, Prırechnyı, Irtyshskıı, Ozıorka, Aqbulaq, Jıenaly, Ertis jáne Jazyq aýyldyq okrýgterine qyzmet etýge jiberiledi. Veterınarlyq qyzmetti jaqsartý úshin qalalyq máslıhattyń sheshimimen 10,5 mln. teńge bıýdjetten bólingen. Endi ol aqshaǵa aýyldarda vetbeketter ashylyp, olar qural-jabdyqtarmen qamtamasyz etiletin bolmaq.
«Egemen-aqparat».