«Samuryq-Qazyna» Ulttyq ál-aýqat qory» AQ basqarma tóraǵasy Ahmetjan Esimov Atyraý jáne Mańǵystaý oblystaryna jumys sapary barysynda KPI kesheniniń qurylys alańynda, Aqtaý jáne Quryq teńiz porttarynda bolyp, munaıshylarmen jáne aımaq basshylarymen kezdesti.
Kezdesý barysynda Qordyń basqarma tóraǵasy elimizdiń munaı salasy taǵy bir daǵdarysty bastan ótkergenin atap ótti. Sonymen birge Qor kompanııalary tobynda qabyldanǵan ońtaılandyrý sharalarynyń nátıjesinde 422 mlrd teńgege rezervter qurylǵanyn habarlady. A.Esimov munaı salasynyń operasııalyq tıimdiligin arttyrý boıynsha jumysty odan ári jalǵastyrý keregin, atap aıtqanda, tıimsiz uńǵymalar qoryna qatysty sharalar qabyldaý qajettigin eskertip ótti.
Mańǵystaý jáne Atyraý oblystarynyń ákimderi Serikbaı Trumov pen Mahambet Dosmuhambetov óz kezeginde daǵdarysqa qarsy qabyldanǵan sharalar úshin qor basshylyǵyna alǵys bildirdi. Qabyldanǵan sharalardyń tıimdiligi daǵdarys kezeńi bastalǵannan beri birde-bir qyzmetker jumystan bosatylmaǵanynan, qyzmeti ýaqytsha toqtatylǵan servıstik kompanııalar da jalaqysyz qalmaǵanynan baıqaldy.
«О́ndirý kóleminiń tómendeýine baılanysty júrgizilgen ońtaılandyrý sharalaryna qaramastan, óndiristegi jumys oryndaryn saqtaý jáne aǵymdaǵy jylǵa arnalǵan óndiristik baǵdarlamalardy oryndaý basymdyq bolyp qala beredi. Jospardan artta qalý bar. Kompanııa basshylyǵy josparly kórsetkishterge qol jetkizýge baǵyttalǵan sharalardy qabyldaýy qajet», dedi Ahmetjan Esimov.
Táýelsizdik jyldarynda eń iri ónerkásiptik kásiporyn – KPI munaı-hımııa kesheniniń qurylysy 74%-ǵa daıyn. Qurylys 2021 jyly aıaqtalady dep josparlanǵan. Joba jylyna 500 myń tonnaǵa deıin polıpropılen óndirýge múmkindik beredi dep kútilýde. A.Esimov josparlanǵan kesteni odan ári saqtaýǵa nazar aýdardy.
Sapar barysynda Qor basshysy keıbir enshiles uıymdardyń basshylaryn synǵa aldy. Naqty aıtqanda, «Qarabatan» PGTES-te óndiriletin elektr energııasynyń tómen baǵasyna qaramastan, túsiniksiz sebeptermen ony basqa kózderden satyp alýdy jalǵastyrýda.
Aqtaý qalasynda qor basshysy Quryq jáne Aqtaý porttaryndaǵy qazirgi jaǵdaımen tanysty. Bul ınfraqurylymdyq nysandardyń elimizdiń tranzıttik áleýeti úshin mańyzy zor. Olardyń qyzmetine Ońtústik-Shyǵys Azııadaǵy pandemııa jaǵdaıy, sondaı-aq keıbir syrtqy faktorlar áserin tıgizdi. Kezdesý sońynda Ahmetjan Esimov QTJ men Quryq portynyń basshylyǵyna porttyń júkteme deńgeıin arttyrý úshin birlesip kúsh jumsaýdy tapsyrdy.