Senat depýtattary Nurlan Beknazarov pen Aıgúl Qapbarova Shymkent qalasy Kókbulaq kenti turǵyndarynyń sapasyz baılanys pen ınternettiń joqtyǵyna qatysty shaǵymdaryn tyńdady, - dep habarlaıdy Egemen.kz.
Senatorlar jergilikti bılik pen baılanys operatoryna júginip, máseleni tez arada sheshýdi surady. Belgili bolǵandaı, aýdanda qajetti qurylǵy ornatylǵan, tek sıgnal qajet bolyp tur. Ákimdik máseleniń jýyq arada sheshiletinin aıtty. Sebebi jańa oqý jyly bastalǵaly tur jáne Kókbulaq mektebinde bilim alatyn 452 oqýshynyń qashyqtan oqýy úshin ınternettiń qoljetimdi bolýy shart.
Buǵan deıin mektep eki 4G-modem qurylǵysymen jumys jasap kelgen, biraq muǵalimderdiń aıtýy boıynsha olardyń jyldamdyǵy tómen. Qazirgi tańda baılanys operatory ınternet sapasyn arttyrý maqsatynda WI-MAX optıkalyq jelisin qosý jumystaryn atqarýda. Cenat depýtattary atalǵan jumystardyń oryndalýyn baqylaýda ustaıtyndaryn aıtty.