Nur Otan partııasy Soltústik Qazaqstan oblystyq fılıaly tóraǵasynyń birinshi orynbasary Ásem Rahmetova jýrnalısterge arnalǵan brıfıngte praımerız bastalǵan alǵashqy 4 kúnde soltústikqazaqstandyq 400-den astam adam oǵan qatysýǵa nıet bildirgenin jetkizdi.
– Barlyq ótinish bildirgen 405 adamnyń 173-i áıel, sonyń ishinde jeteýi kópbalaly ana, – dedi Á.Rahmetova. – Kandıdattardyń jastaryna keletin bolsaq, 35-ten 50 jasqa deıingi kandıdattardyń úlesi – 46 paıyz, al 35-ke deıingiler – 24 paıyz. Qyzmet etý salalaryn alatyn bolsaq, 49 paıyzdyq eń úlken úlesti bilim salasynyń qyzmetkerleri alyp otyr. Odan keıingi orynda ShOB ókilderi. Olar 12 paıyzdyq úlesti ıelengen. Sonymen birge aýyl sharýashylyǵy, densaýlyq saqtaý, sport, mádenıet salasynyń ókilderi de bar.
Eske sala ketetin bolsaq, praımerızge qatysýshylardyń úgit-nasıhat jumystary 7 qyrkúıekten bastalyp, 3 qazanda aıaqtalady. Ony kandıdattar ózderiniń jeke qarjylarynyń esebinen júrgizedi. Sheteldik zańdy tulǵalar men azamattarynyń qarjylandyrýyna tyıym salynǵan. Sondaı-aq memlekettik organdardyń qarjylandyrýyna da bolmaıdy.
Á.Rahmetova óziniń sózinde kandıdattardyń debattarǵa qatysyp, ózderiniń baǵdarlamasyn aıtýy mindetteletinin eskertti.
– Olarǵa kez kelgen qatysýshy suraqtar qoıa alady. Debattyń uzaqtyǵy 90 mınýttan aspaıdy. Qalalyq jáne aýdandyq máslıhattarǵa qatysýshylar kem degende bir debatqa, oblystyq máslıhatqa ótýden úmitkerler eki debatqa jáne Májilis depýtaty bolýdy qalaıtyndar úsh debatqa qatysýy kerek, – dedi ol.
Úmitkerlerge daýys berý 1-3 qazan aralyǵynda ótedi.
Soltústik Qazaqstan oblysy