Tórtkúl dúnıeni jaman tumaýdyń jan túrshiktirer lebi jaılaǵaly kitapqumar qaýym jan serigimen ajyrap qala jazdap edi. Rýhanı nárdiń tinin jalǵastyrar jaqsy jol tótennen tabyldy.
Kókshetaý qalalyq aqparattyq kitaphanalar júıesi tamyz aıynan bastap jan jadyratarlyq osyndaı jobany qolǵa alyp, júıeli júrgize bastady. Negizi bul elde karantın bastalǵan kezde oıǵa oralǵan ońdy jospar bolatyn. Tyńnan tabylǵan tásil arqyly qalyń oqyrman men rýhanı azyq ordasynyń ejelden qalyptasqan baılanysy úzilgen joq. Qaıta burynǵydan da jaqyndasa túskendeı.
Elektrondyq kitaphanaǵa oqyrmandar tarapynan kún saıyn birneshe qońyraý túsedi. Olar ózderin qyzyqtyratyn, oqysy kelgen shyǵarmalaryna tapsyrys beredi. Kitaphana qyzmetkerleri bolsa qaýipsizdikti saqtaý maqsatynda barlyq talaptardy muqııat oryndaı kelip, shyraıly shyǵarmaǵa, rýhanı nárge shóldep otyrǵan oqyrmandardyń tilegin oryndap, qalaǵan kitaptaryn jetkizip beredi. Mine, osyndaı oń sharýa birneshe aıdan beri múltiksiz júzege asyrylýda.
- Bizdiń eń basty maqsatymyz kórkem ádebıetten nár alatyn kópshiliktiń kitaptan qol úzip qalmaýy. Keshegi karantın kezinde burynǵy oqyrmandarymyzǵa jańa lek qosyldy, – deıdi kitaphanashy Nazgúl Dáýrenbek.
Baılanyssyz kitap jetkizýdiń bir tıimdiligi, oqyrman kóńili qalaǵan dúnıesin óz shańyraǵynan qarǵaadym jer uzap shyqpaı-aq, taba alady. Kitaphana qyzmetkerleri oqyrmandardyń ótinishine oraı suraǵan kitaptaryn mekenjaıyna alyp kelip, esigine ilip ketedi. Bar bolǵany sol-aq.
О́zderiniń mindetterine jaýapkershilikpen qarap, oqyrmandarynyń kádesine qysyltaıań kezde de jarap turǵan rýhanı qazyna ortalyǵynyń ońdy sharýasy ózgege úlgi bolarlyq-aq. Qazir qalalyq kitaphanalar aqparattyq júıesindegi 12 mekeme osylaı jumys isteýde. Kúni búginge deıin kitaphanashylar qala turǵyndaryna myńnan artyq kitap jetkizipti. Aldaǵy ýaqytta tıimdi ádistiń sharapatyn qarııalar men júrip-turýy qıyn adamdar kóre bermek.
Shyn máninde kóp kóńilinen shyǵatyn joba emes pe?!
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.