Qazaq rýhanııaty talantty óner ıelerinen eshqashan kende bolǵan emes. Sondaı tulǵanyń biri – árıne Nurǵısa Tilendıev bolatyn.
Dáýlesker kúıshi, talantty kompozıtordyń toqsan bes jyldyq mereıtoıyna oraı elimizde túrli shara qolǵa alyna bastady. Sonyń biri – Ruh.kz portaly bastaǵan qazaqtyń áıgili kúıshisi, KSRO halyq ártisi, Halyq Qaharmany Nurǵısa Tilendıevtiń 95 jyldyǵyna arnalǵan kúı estafetasy deýge bolady. Bul týraly «Rýhanı jańǵyrý» qazaqstandyq qoǵamdyq damý ınstıtýty habarlaǵan bolatyn.
Estafetany halykaralyq konkýrstardyń laýreaty Saıyrhan Ertis Parlament Májilisiniń depýtaty Nurtaı Sabılıanovqa, Qurmanǵazy atyndaǵy Qazaq ulttyq konservatorııasynyń rektory Arman Júdebaevqa, Qazaqstannyń eńbek sińirgen qaıratkeri Meırambek Bespaevqa, «Daryn» memlekettik jastar syılyǵynyń laýreaty Murager Saýranbaev, Baǵylan Abdraıymov, Erdos Qanaev jáne halyqaralyq konkýrstardyń laýreaty Jánibek Qazbekulyna joldaıdy. Estafeta barysy Ruh.kz portalynda, onyń áleýmettik jelilerindegi paraqshalarynda habarlanyp otyrady.
Saıyrhan Ertis óz estafetasyn Nurǵısa Tilendıevtiń «Jekpe-jek» kúıin oryndap usyndy.