Oral qalasynda estetıkalyq baǵyttaǵy mektep-gımnazııanyń jańa ǵımaraty paıdalanýǵa berildi, - dep habarlaıdy Egemen.kz QazAqparatqa silteme jasap.
Onyń ashylý rásimine qatysqan oblys ákimi Ǵalı Esqalıevtiń atap ótkenindeı, Ata zańnyń 30-babynda azamattardyń memlekettik oqý oryndarynda tegin orta bilim alýyna kepildik beriletini kórsetilgen. Osyǵan oraı óńirde aýqymdy jumystar atqarylýda.
Mysaly, bıyl 33 mektep kúrdeli jóndelip jatsa, alty bilim ǵımaraty jańadan salynýda. 6 mekteptiń tórteýi memleket, ekeýi jeke ınvestorlardyń qarajaty esebinen boı kóterýde. Úsh qabatty, 450 oryndyq estetıkalyq baǵyttaǵy mektep- gımnazııanyń ǵımaratyn salýǵa
«QPO b.v.» kompanııasy 1,7 mlrd teńge bólse, qurylysty «Naýryz» kompanııasy atqardy. Buryn mektep-gımnazııa eski balabaqsha ǵımaratynda ornalasyp, 500-den astam oqýshy úsh aýysymda bilim alǵan edi. Endi jańa orynda 850 shákirttiń eki aýysymda oqýyna tolyq múmkindik jasalǵan. Sonyń ishinde 140-tan astamy birinshi synypqa qabyldanbaqshy. Mektep dırektory Álııa Qaıyrjanovanyń sózine qaraǵanda, 1-4 synyp oqýshylary bilim ǵımaratynda sabaq oqyp, tapsyrmalaryn oryndap, úsh mezgil tamaq iship, úılerine qaıta alady. Munda matematıka, bıologııa jáne gýmanıtarlyq pánder tereńdetilip oqytylady. Bıyl jeti qazaq synyby ashylǵan mektepte 77 muǵalim dáris berse, sonyń teń jartysynan astamy – joǵary sanatty ustazdar.
Qalalyq bilim berý bóliminiń basshysy Aqjarqyn Temirhanovanyń málim etkenindeı, mektep «Stem» bilim berý júıesi negizinde jumys jasaıtyn bolady. Fızıka, matematıka, hımııa, bıologııa kabınetteri osy zamanǵy qural-jabdyqtarmen qamtylsa, shákirtterdiń qarym- qabiletin arttyrýǵa múmkindik beretin túrli úıirmeler de bar.