Shymkent qalasynyń mádenıet, tilderdi damytý jáne muraǵat basqarmasy mamandarynyń aıtýynsha, festıvalderge Reseıdiń Bashqurtstan, Tatarstan Respýblıkalary men Altaı ólkesinen, Belarýs, Ázirbaıjan, Armenııa, Túrikmenstan, О́zbekstan, Tájikstan, Qyrǵyzstannan jáne óz elimizden 71 ónerpaz qatysqan. Onyń ishinde 41-i estradalyq ánshi bolsa, 30 qatysýshy halyq aspaptarynda óner kórsetti.
Sondaı-aq, TMD memleketterinen tys AQSh, Moldova, Monǵolııa elderinen de ártister qonaq retinde qatysyp, ystyq sálemderin joldady.
Halyq aspaptarynda oryndaýshylar arasyndaǵy óner saıysy TMD elderiniń ózara mádenı-gýmanıtarlyq yntymaqtastyǵyn nyǵaıtý maqsatynda uıymdastyryldy. Oǵan Sankt-Peterbýrg qalasynan "Donsy" jáne "Serebrıannye strýny" orys halyq aspaptyq orkestrleri, Monǵolııa Respýblıkasynan "Altaı Kaı" ansambli, О́zbekstannan "Abbos" toby jáne Ravshan Iýnýsov, Moldova Respýblıkasynan "Pan akademık" ansambli, Qazaqstannan álemge tanymal "Ulytaý" toby, sondaı-aq "SARMAD", "Qarataý qazynasy", "Adyrna", "Arqa áýenderi", "Alataý", "Amanat", "Altaı" syndy halyqtyq etno-folklorlyq ansamblder qatysty. Kásibı ónerpazdarmen qatar áýesqoı oryndaýshylar da óz baǵyn synap, kórermen qaýymǵa ulttyq aspaptyń ózindik erekshe dybysy men boıaýyn sheber jetkize bildi.
Vashıngton qalasynan Nika Davidhizar, Sank-Peterbýrg qalasynan Olga Blohına, Qyrǵyzstannan Jııdesh Muratqyzy, Reseıdiń Kabardıno-Balkar Respýblıkasynan Halımat Gergokaeva men Altaıdan "Chýıa" toby Shámshi áýenderin naqyshyna keltire oryndap, tyńdarmannyń ystyq yqylasy men qoldaýyna ıe boldy. Al, otandyq ónerpazdarǵa toqtalsaq, Nur-Sultan qalasynan Asylhan Shalqarov, Oralhan Altynbekov syndy tanymal ánshiler, Qyzylorda oblysynan "Ekspress" ansambli, Shymkent qalasynan "Asyl ájeler" toby qatysty.
Festıval qorytyndysy boıynsha qatysýshylarǵa qala ákiminiń arnaıy dıplomy tabystalady.
Eske sala keteıik, onlaın rejımde ótken festıvalge qatysýshylardyń beıne ótinimderi 15 tamyzǵa deıin qabyldanǵan bolatyn. Sheberligimen kózge túsken ónerpazdar karantın rejımi aıaqtalǵannan keıin Shymkent qalasynda ótetin halyqaralyq is-sharalarǵa shaqyrylady.