Qazaqstanda salyq pen tólemder sany azaıady. Bul týraly Ulttyq ekonomıka mınıstri Rýslan Dálenov Úkimet otyrysynda aıtty, - dep habarlaıdy Egemen.kz.
"Búgingi tańda Salyq kodeksinde 12 salyq, 48 kishi salyq túri, 10 tólemaqy jáne 6 alym qarastyrylǵan. Tıisinshe, salyqtar men tólemder sanyn barynsha azaıtý boıynsha jumys júrgiziledi", - dedi Rýslan Dálenov.
Mınıstrdiń aıtýynsha, ekonomıkanyń asa kóp zardap shekken sektorlary úshin balamaly negizde aınalymnan bólshek saýda salyǵyn tóleý quqyǵyn qoldaný máselesi qaralady. "Bıýdjettiń túıindi koeffısentteri jıyntyǵy ázirlenedi. Bıýdjet saıasatynyń tıimdiligi men turaqtylyǵyn baǵalaý engiziledi. "Keńeıtilgen bıýdjetti" engizý sheńberinde shoǵyrlandyrylǵan bıýdjetke bıýdjetten tys qorlardy qosý arqyly Memlekettik qarjyny keshendi baǵalaý engiziledi", - dedi ol. Eske sala keteıik, Prezıdent Qasym-Jomart Toqaev Qazaqstan halqyna Joldaýynda salyq saıasaty eldiń barlyq azamattary úshin túsinikti bolýy tıis degen bolatyn.