Áskerı bıletterdi sıfrlandyrý usynyldy

Otyrysta áskerı bıletterdiń qaǵaz nusqasynan bas tartý, ony tek soǵys jaǵdaıynda ǵana berý usynyldy. Qalǵan ýaqytta áskerı bılet jergilikti áskerı komıssarıatta saqtalady, al áskerı mindettiligi týraly habarlama «elektrondy úkimet» portalyndaǵy azamattardyń jeke kabınetine jiberiledi.

«Bul usynys júzege asy­rylǵan jaǵdaıda azamattar­dan áskerı bılettiń túpnus­qasy talap etilmeıdi jáne bıýd­jettik shyǵyndardy 100% únemdeýge múmkindik bere­di. Qajetti derekterdiń bárin egov.kz. portaly arqyly Qor­ǵanys mınıstrliginiń aqpa­rattyq júıesinen alýǵa bolady. Biz sondaı-aq azamattar turǵylyqty jerin aýystyrǵan kezde olardy áskerı esepke avtomatty túrde qoıýdy usynamyz. Tirkeý kezinde aqparat avtomatty túrde bizdiń derekqorymyzǵa túsedi de, birden áskerı esepke alamyz. Bul úshin azamattarǵa áskerı komıssarıatqa barýdyń qajeti joq. Jalpy, biz 16 mem­lekettik qyzmetti birden avtomattandyrýdy usynamyz», deıdi Qorǵanys mınıstriniń orynbasary Tımýr Dándibaev.

Sonymen qatar birqatar mem­lekettik kórsetiletin qyz­metterdi kompozıttik tásil­men, ıaǵnı «bir ótinish – memle­kettik qyz­metter kesheni» qa­­ǵı­daty bo­ıynsha kórsetý usy­­nyldy. Osy­laısha, azamat ózin áskerı esepke qoıýdy ótingen kezinde oǵan avtomatty túrde «zapastaǵy ofıserlerge, serjanttarǵa, sar­bazdarǵa áskerı bılet nemese olar­dyń telnusqasyn (áskerı bılettiń ornyna ýaqytsha kýálik) berý» memlekettik qyzmetin kórsetý týraly habarlama joldanady.

Sondaı-aq otyrys barysynda avtokólik quraldaryn tirkeý, kepildi tirkeý jáne júr­gizýshi kýáligin berý salasyn­daǵy memlekettik qyzmetterdi avtomattandyrýǵa qatysty má­seleler talqylandy. Búginde bul qyzmetter portalda qol­jetimdi, alaıda atalǵan memle­kettik qyzmetterdiń túrlerin kóbeıtý, sol arqyly ony alý tártibin jeńildetý usynyldy.

«Bul másele ózekti. Mem­le­ket basshysy memlekettik qyz­metterdi avtomattandyrý jáne ońtaılandyrý jóninde naqty mindetter qoıdy. Qaralǵan usynystar osy tapsyrmany iske asyrý sharalaryna ózek bo­lady. Tehnıkalyq turǵydan buǵan daıynbyz, endigi ortaq mindetimiz – barlyq bıznes-prosesterdi birlesip pysyqtaý jáne osy baǵytta jumysty bas­taý», dedi Sıfrlyq damý, ınno­vasııalar jáne aeroǵarysh ónerkásibi mınıstriniń mindetin at­qarýshy Baǵdat Mýsın.

Otyrysta sıfrlyq komıssarlar ishki ister organdary kór­setetin birqatar memlekettik qyzmetterdi alý prosesin jeńil­detýdi usyndy. Bul boıynsha jaýapty organ­dar­ǵa ony iske asyrý tapsyryldy.