"Nazarbaev Ýnıversıtet" DBBU Basqarýshy keńesiniń sheshimimen Pıa Iýrıı Vladımırovıch "University Medical Center" korporatıvtik qorynyń Basqarma tóraǵasy bolyp taǵaıyndaldy, - dep habarlaıdy Egemen.kz.
Búkil álemge belgili kardıohırýrg Iýrıı Pıa elimizdiń densaýlyq saqtaý júıesine eleýli úles qosty. Ol kisiniń jetekshiligimen búgingi tańda biregeı kúrdeli otalar jasalatyn "Kardıohırýrgııa ulttyq ǵylymı ortalyǵy" AQ (budan ári – Ortalyq) negizi qalandy. Ortalyq ashylǵannan keıin halyqaralyq aýqymdaǵy klınıkaǵa aınalyp, álemniń 22 úzdik kardıohırýrgııalyq ortalyǵy qataryna endi. 2011 jyldan bastap Ortalyq dárigerleri qosalqy qan aınalymy quralǵysyn ımplanttaý otalaryn jasaı bastady. 2012 jyly óńirde alǵashqy bolyp Iý.V.Pıa donor júregin transplanttaý otasyn, 2016 jyly transplantologııadaǵy eń kúrdeli otalardyń biri sanalatyn ókpe transplantasııasyn respýblıkada tuńǵysh ret jasady. 2017 jyly onyń jetekshiligimen halyqaralyq deńgeıde alǵash ret tolyqtaı jasandy júrek ımplanttaldy. 2018 jyldyń jeltoqsan aıynda júrektiń sol jaq qalqanshasynyń ımplanttalǵan qurylǵysyn tolyq almastyrý Ortalyqtyń eń joǵarǵy kórsetkishteriniń biri boldy. Sonymen qatar Ortalyq - jańa týǵan sábılerge jasalatyn joǵary tehnologııalyq kópsatyly kardıohırýrgııalyq operasııalardyń kýratory.
N.I. Pırogov atyndaǵy 2-shi Máskeý memlekettik medısınalyq ınstıtýtynyń túlegi Iýrıı Vladımırovıch Pıa túrli jyldary Reseı, Qyrǵyzstan, Túrkııa sııaqty elderde jumys istedi. 2003 jyly elge oralyp, Qazaqstanda kardıohırýrgııalyq qyzmetti damytýǵa kiristi. 2003-2010 jyldary Ulttyq ǵylymı medısınalyq ortalyqta qyzmet etip, 2010 jyldan «Kardıohırýrgııa ulttyq ǵylymı ortalyǵy» AQ basqardy. Iýrıı Pıa osy Ortalyqtaǵy qyzmetin hırýrgııa jáne ǵylym jónindegi dırektory retinde jalǵastyra beretinin aıta ketý kerek.
Iýrıı Pıa - "Qazaqstannyń Eńbek Eri" memlekettik nagradasynyń, "Qurmet" jáne "Parasat" ordenderiniń ıegeri. Qazaqstan patrıottarynyń V jalpyulttyq forýmynda "Jyl patrıoty", "Jyl dárigeri 2012" atalymynda "Altyn Adam" halyqaralyq júldesiniń laýreaty atyndy.
"University Medical Center" korporatıvtik qoryn buǵan deıin basqaryp kelgen Jumadilov Jaqsybaı Shaımardanuly "National Laboratory Astana" Bas dırektory jáne Nazarbaev Ýnıversıtetiniń Medısına Mektebiniń professory retinde qyzmetin jalǵastyrady.
"University Medical Center" korporatıvtik qory Ana men bala ulttyq ǵylymı ortalyǵy, Balalardy ońaltý ulttyq ortalyǵy, Respýblıkalyq dıagnostıkalyq ortalyq, "University Medical Center" korporatıvtik qorynyń Qyzylorda fılıaly sııaqty elimizdiń jetekshi medısınalyq ortalyqtaryn biriktiredi. Qor "Nazarbaev Ýnıversıtet" DBBU Qamqorshylyq keńesiniń 2015 jylǵy 20 qyrkúıektegi sheshimimen "Ulttyq medısınalyq ortalyq" AQ enshiles uıymdary negizinde quryldy.