Aldaǵy ýaqytta "Qazaqstan" teleradıokorporasııasy óndirgen otandyq ónimder sheteldik telearnalardan usynylmaq, dep habarlaıdy Egemen.kz.
"Qazaqstan" Ulttyq arnasynyń 7 telehıkaıasy, "Balapan" arnasynyń 5 anımasııalyq jobasy AQSh-ta kabeldik arnalar, al Latyn Amerıkasy elderinde VOD jáne onlaın-kanaldar arqyly kórsetiledi. Endi "Ǵazız júrek", "Oralý", "Qashqyn", "Jańǵyryq", "47 balanyń anasy", "Shyraǵym", "Saǵan senemin" telehıkaıalary men "Balapan" telearnasynyń "Tynymsyz shójeler", "Sábı", "Erkeler", "Shahmat patshalyǵy", "Pyraqtar" anımasııalyq jobalary atalǵan elderde aǵylshyn, ıspan jáne portýgal tilderinde kórsetiledi.
Kelisimshart AQSh-tyń jelilik jáne spýtnıktik habar taratý qyzmetin júzege asyratyn "Olympusat" kompanııasymen jasaldy.
Sonymen qatar teleradıokorporasııa óndirgen birqatar jobalar TMD-daǵy eń úzdik onlaın-kınoteatr sanalatyn IVI.RU platformasyna júkteledi. Budan bylaı "Teketires", "Abysyndar", "Janym meniń", "Qazbat", "Qanatsyz qustar", "Ǵazız júrek", "Shyraǵym", "Úzilmes úmit" serıaldary men "Kúlki izdegen Kúnekeı", "Sábı", "Erkeler" mýltserıaldaryn atalǵan platformadan tamashalaýǵa bolady. IVI.RU platformasynyń kontenti bir aıda 50 mıllıonǵa jýyq qaralym jınaıdy.
Al otandyq "Áke", "Shyraǵym" telehıkaıalary búkilálemdik "Amazon Prime" platformasynda kórsetile bastaıdy.
"Korporasııanyń otandyq óndiristi nátıjeli jolǵa qoıýy syrtqy telenaryqqa shyǵýǵa múmkindik berip otyr. Telehıkaıalardan bólek, Túrkııanyń eń iri medıaqurylymy TRT arnasy teleradıokorporasııa túsirgen "Kóshpendiler", "Ǵasyrlar úni", "Ult maqtanyshy", "Qazaq dalasynyń qupııalary" derekti fılmderin túrik tiline aýdaryp, óz efırinde kórsetpek. Bul – otandyq kınoındýstrııa úshin úlken naryq. Buǵan qosa, dál qazirgi ýaqytta bizdiń serıaldar Qyrǵyz Respýblıkasy, О́zbekstan, Tatarstan arnalarynda kórsetilýde. О́z ónimderimizdi syrtqa satýdan bólek, jańa maýsymnan bastap, BBC, Discovery-diń eń tańdaýly jobalaryn qazaq tiline aýdaryp, "Qazaqstan" jáne "Abai tv" arnalarynyń efırinen bermekpiz", - dedi "Qazaqstan" RTRK AQ Basqarma tóraıymy L.Tanysbaı óz sózinde. Sondaı-aq bul jóninde tıisti kelisimderdiń jasalǵanan atap ótti.
Kúzgi telemaýsymda "Qazaqstan" Ulttyq telearnasynan 14 jańa telehıkaıa, "Balapan" arnasynan jalpy sany 253 bólimnen turatyn 17 anımasııalyq joba usynylady.