Elordada eńbek mıgranttary birneshe HQKO-dan ruqsat ala alady. Bul týraly elorda ákimdiginiń baspasóz qyzmetine Egemen.kz silteme jasap habarlaıdy.
Nur-Sultan qalasyndaǵy halyqqa qyzmet kórsetý ortalyqtarynda "Eńbek ımmıgranttaryna ruqsat berý jáne qaıta rásimdeý" memlekettik qyzmetin usyný boıynsha pılottyq joba iske qosyldy. Ol "Jumyspen qamtý 2020 jol kartasy" aıasynda, sondaı-aq kóshi-qon qyzmetiniń memlekettik qyzmetterin ońtaılandyrý maqsatynda júzege asyrylýda.
"Eger buryn ruqsattardy rásimdeý kezinde jumys berýshiler men sheteldikter Nur-Sultan qalasy, Imanov kóshesi 31 mekenjaıy boıynsha ornalasqan Kóshi-qon qyzmetteri ortalyǵyna ótinish bildirse, endi bul memlekettik qyzmetti qaladaǵy 6 HQKO-dan alýǵa bolady", delingen habarlamada.
Osylaısha, azamattarǵa yńǵaıly bolý úshin, kóshi-qon qyzmet basqarmasy Azamattarǵa arnalǵan "Úkimettik memlekettik Korporasııasy" KEAQ kelisimi boıynsha, 16 maýsymynan bastap S409 kóshesinde (Saryarqa aýdany) ornalasqan Nur-Sultan qalasynyń HQKO fılıalynda eńbek ımmıgranttaryna ruqsat berýdi júzege asyrady.
Sonymen qatar, 26 tamyzdan bastap Máńgilik el, 30 úı (Esil aýdany), Táýelsizdik dańǵyly, 32 úı (Almaty aýdany) jáne Abaı dańǵyly, 80 úı (Baıqońyr aýdany) mekenjaılarynda ornalasqan qalanyń 3 – HQKO-da osyǵan uqsas jumys uıymdastyrylǵan.
Budan basqa, HQKO-da shetel azamattarynyń kóp jınalýyn boldyrmas úshin 1 qyrkúıekten bastap, qosymsha osy memlekettik qyzmetti Saýran kóshesi, 7 úı (Esil aýdany), Respýblıka dańǵyly, 43 úı (Saryarqa aýdany) boıynsha ornalasqan 2 HQKO-dan alýǵa bolady.
"Eńbekshi kóship kelýshilerge ruqsattar berý jáne uzartý" memlekettik qyzmeti mamandarǵa kedergisiz qol jetkizý arqyly elektrondyq kezek rejıminde usynylady.